İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 359 Hüküm no: 180 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya’nın Osmanlı’ya saldırması üzerine herkesin savaşa hazırlanması Cümle ümmet-i Muhammed bu def‘a gazâ ve cihâda hâzır ve âmâde olmaları bâbında fermân-ı âlîdir. Bâ-sahh-ı âlî İstanbul kādısı fazîletli efendi Cümleye ma‘lûm olduğu üzere Rusyalının evvel ve âhir dîn ü Devlet-i aliyye-i Muhammediye hakkında derkâr olan husûmetini icrâya mukaddime olmak üzere Rum milletine serbestiyet tahsîli arz-ı fâsidiyle ızhâr eylediği inâd ve ısrârı ancak umûm millet-i İslâmiye hakkında kurduğu sû’-i-kasd ve ihânet dâ‘iyesinden nâşî olarak ya‘ni bunun üzerine i‘lân-ı harb ettiği hâlde dahi evvelkiler gibi hudûd ve memleket da‘vâsı olmayıp mücerred dîn-i mübîn kavgası olacağından Anadolu ve Rumeli’de kâin kâffe-i kazâ ve memâlikin vücûh ve a‘yânları ve Arnavudluk hânedân ve mîr-i mîrânları fevc fevc Dersa‘âdet’e celb ve da‘vet ve Rusyalının şer‘an ve aklen kabûlü bir vechile câiz olmayan tekâlif-i kerîhesi keyfiyeti kendilerine i‘lân ve işâ‘at olunarak ber-muktezâ-yı diyânet ve hamiyyet umûm millet-i İslâmiye beyninde hakīkī ve samîmî akd ve tesîs olunan usûl-i ittifâk ve ittihâd üzere îcâb ve iktizâsına göre memâlik-i mahrûse-i şâhâneden tez elden külliyetli asâkir-i İslâmiye tertîb olunduğundan başka ileride lede’l-iktizâ on iki yaşından yetmiş yaşına kadar mecmû‘-ı ehl-i İslâm ayaklanıp cihâd fî-sebîli’llah farîzasını icrâya kıyâm etmek üzere cümle tarafından ale’l-umûm ta‘ahhüd olunarak memleketlerine i‘âde olunmuş ve taraf-ı saltanat-ı seniyyeden dahi tedâbîr-i lâzime-i ihtiyâtiyeye teşebbüs olunarak ordu seraskerliği Kocaeli ve Hüdavendigar sancakları mutasarrıfı vezîr-i mükerrem sa‘âdetlü Hüseyin Paşa hazretlerinin uhde-i istibhâline ihâle ve tefvîz ve Tuna boyuna ve sâir mahal ve mevâkı‘-ı mukteziyyeye iktizâsına göre seraskerler ve me’mûrlar ve peyder pey leşker-i zafer-peykerler ta‘yîn kılınmış idi. El-hâletü hâzihî Rusyalı işbu Şevvâli’l-mükerremin yirmi üçüncü günü Prut nehrini tecâvüz ve memleket-i Boğdan’a duhûl ile i‘lân-ı harb eylediği haberi Silistre vâlîsi ve Tuna cânibi seraskeri vezîr-i mükerrem sa‘âdetlü el-Hâc Ahmed Paşa hazretleri tarafından tahrîr ve inhâ olunmuş olduğundan geçen gün bâb-ı fetvâ-penâhîde sâbık ve esbak şüyûh-ı İslâm ve vüzerâ-i izâm ve sudûr-ı kirâm ve ulemâ-yı a‘lâm ve vükelâ-yı Devlet-i aliyye-i ebed-kıyâm ile akd olunan meclis-i şûrâda lede’l-müzâkere Rusyalı millet-i İslâmiye’nin düşman-ı tabî‘îsi olduğu evvel ve âhir bilinmiş ve bu def‘a dahi bu vechile memâlik-i mahrûseye tecâvüz ve tahattî ile bi’l-fî‘l i‘lân-ı harb ve ızhâr-ı husûmet eylemiş olduğuna mebnî taraf-ı Devlet-i aliyyeden dahi avn ü inâyet-i hazret-i bârîye tevekkül ve i‘timâd ve imdâd-ı rûhâniyet-i cenâb-ı risâlet-penâhîye tevessül ve istinâd ile mukābele-i bi’l-misl levâzımının icrâsına kıyâm olunmak ve kâffe-i ehl-i İslâm yeni başdan levâzım-ı ittifâk ve ittihâdı teyîd ve tekîd ederek a‘lâ ve ednâ ve küçük ve büyük cümleten dîn yolunda mâl ve câna bakmayıp sıdk ile çalışmak lâzım geldiği taraf-ı şer‘-i şerîfden beyân buyrulmak hasebiyle ber-muktezâ-yı şerî‘at-ı mutahhara müste‘înen bi-tevfîkıhî te‘âlâ tedâbîr-i lâzime-i gazâ ve cihâda mübâşeret olunarak ordu seraskeri müşârun-ileyh külliyetli piyâde ve süvâri askeriyle Tuna tarafına ihrâc ve i‘zâm olunmak üzere olmağla mukaddem ve mu’ahhar herkese bildirildiği vechile Rusyalının bu def‘aki tutumu devletçe ve mülkçe muhârebe kabîlinden olmayıp mücerred İslâmiye hakkında derkâr olan niyet-i küfriyesini icrâya mukaddime-i bâtıla olduğundan şübhe olmadığından millet-i İslâmiye dahi ona göre davranıp muhâfaza-i dîn-i mübîn ve muhârese-i memâlik-i Müslimîn için cân ve baş ile çalışmak kâffe-i ehl-i îmâna ale’l-infirâd vâcibe-i zimmet-i diyânet olarak inşâallâhu te‘âlâ Anadolu ve Rumeli taraflarından hudûdlara sevk ve ihrâc olunmuş ve olunmakda olan asâkir-i nusret-me’ser cedel ve kuvvet-i hazret-i rabb-i mu‘în ve teveccüh-i kulûb-ı müminîn ile mansûr ve muzaffer olarak adüvv-i dîn-i hazelât-karîn karîben belâsını bulup niyet-i bâtılası kendi başına döneceği eltâf-ı ilâhiyeden ümid-i vâsık ise dahi ma‘âzallâhi te‘âlâ hasbe’l-muhârebe ileride maslahat sıkışıp da millet-i İslâmiye’nin [65b] ale’l-umûm dîn-i mübîn uğruna kıyâmı lâzım gelir ise ol vakit on iki yaşından yetmiş yaşına kadar kâffe-i ehl-i İslâm’ın fî-sebîli’llâh gazâ ve cihâd için şimdiden hâzır ve âmâde olmaları vâcibeden olduğuna binâen keyfiyet bu def‘a Anadolu ve Rumeli taraflarına mahsûs evâmir-i şerîfe ısdârıyla cümleye beyân ve i‘lân olunmuş olmağla siz dahi Âsitâne-i aliyyede kâin bi’l-cümle mahallât imâmlarını celb ile Rusyalının millet-i İslâmiye hakkına olan sû’-i kasd ve ihânetini beyân ve tefhîm ederek kâffe-i ehl-i îmân an-samîmi’l-kalb mansûriyet-i dîn-i mübîn ve makhûriyet-i adüvv-i dûzah-karîn için bi’l-cümle cevâmi‘ ve mesâcidde akīb-i salât-ı mefrûzada de‘avât-ı hayriyeye iştigāl ve muvâzabet eylememlerini ve muktezâ-yı gayret-i dîniyye ve hamiyyet-i İslâmiye üzere lede’l-iktizâ îfâ-yı farîza-i gazâ ve cihâd ve tahsîl-i fevz ü necât-ı rûz-me‘âd için bi’l-cümle müminîn-i muvahhidîn dahi şimdiden tehiyye-i tedârükât-ı seferiyeye bezl ü sa‘y ü makderet etmelerini tenbîh ve tekîde mübâderet eyleyesin deyü Fî 2 min Za sene 1243