İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 360 Hüküm no: 181 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Geldikleri yerlere gönderilen Ermenilerden kalan Galata, Beyoğlu ve Boğaziçi’ndeki mülklerin vakıf olarak kaydedilmesi Galata ve Beyoğlu’nda ve Boğaziçi’nde kefere menâzili vakf-ı hümâyûna tashîh kılınmış, ilmuhaberdir İsâet-i vâkı‘alarına mebnî bundan mukaddemce bâ-irâde-i seniyye vilâyetlerine ve mahâll-i sâireye def‘ olunmuş ve gerek Dersa‘âdet ve sâir mahallerde Ermeni mahallâtına nakl ve iskân ettirilmiş olan Ermenilerin Galata ve Beyoğlu ve Boğaziçi’nde vâki‘ uhdelerinde olan menzil ve yalı ve bağları ve vakten mine’l-evkāt kefereye bey‘ ve îcâr olunmamak ve hâsıl olacak esmânı ashâbı taraflarına ve düyûnu mahallerine teslîm olunmak üzere bi’l-müzâyede değer bahâlarıyla ehl-i İslâm’dan tâliblerine bey‘ olunarak yedlerine mahallerinden müceddeden senedât i‘tâ ettirilmesi husûsu şeref-efzâ-yı sudûr buyrulan hatt-ı hümâyûn-ı şevket-makrûn-ı şâhâne mantûkunca mu‘teberân-ı ricâl-i Devlet-i aliyyeden kethüdâ-yı hazret-i vekâlet-penâhî sâbık sa‘âdetlü atûfetlü Hulusi Ahmed Efendi hazretlerine ihâle buyrulmakdan nâşî ber-minvâl-i muharrer fürûht olunacak menzil ve yalı ve bağların vakf olan mahallerine temessük alınmak ve mülk olan yerleri hüccet-i şer‘iye ettirilmek üzere sûret i‘tâ olunmakda ise de o makūle menzil ve yalıların bey‘ ve îcârı mücerred ehl-i İslâm’a mahsûs ve meşrût olduğundan ekserîsi dûn bahâ ile satılmakda ve bunların ba‘zıları dahi sırf mülk olduğu tebeyyün eylemekde idüğü beyânıyla mülk olan mahaller böyle dûn bahâ ile satılıp gitmekden ise fîmâ-ba‘d o makūle mülkiyeti tebeyyün eden mahaller nef‘an li’l-vakf Evkāf-ı Hümâyûn nâzırı sa‘âdetlü atûfetlü efendi hazretleri tarafından muktezâ-yı şer‘-i şerîf ve usûl-i vakf-ı münîfe tatbîkan vakf-ı hümâyûna ba‘de’t- tashîh îcâbına göre icâre-i müeccele takdîr kılınarak iştirâ edenlerin zabt ve tasarrufu için cânib-i vakf-ı hümâyûndan temessük verilmesi ve şimdiye kadar Başmuhâsebe’den verilmiş olan sûretlerde yazılan mülk mahaller için hüccet-i şer‘iye ettirilmek ibâresinin terkiyle ba‘d-ez-în kadîmî vakıf olan mahalline vakfı tarafından temessük alınmak ve mülk olan mahalline <> mehâkimden evkāf-ı sâire mütevellîleri taraflarından hüccet ve temessük verilmeyip mülkiyeti tebeyyün eden mahalleri iştirâ edenler ketm ve ihfâ etmeyerek nâzır-ı müşârun-ileyh hazretleri tarafına ifâde ile usûl-i meşrût üzere vakf-ı hümâyûna ba‘de’t-tashîh taraf-ı vakf-ı hümâyûndan müceddeden temessük verilmek şerâiti derc ve tezkâr kılınmak üzere Başmuhâsebe’den sûret i‘tâ kılınması sûreti keyfiyâtı me’mûr-ı müşârun-ileyh hazretleri tarafından bâ-takrîr inhâ olunmuş olmağın keyfiyet hâk-i pây-ı hümâyûn-ı şâhâneye lede’l-arz ol vechile tanzîm ve icrâsı husûsuna irâde-i seniyye-i mülûkâne müte‘allik olarak ol bâbda hatt-ı şerîf-i mülûkâne tırâzende-i sahîfe-i sudûr olmuş olmağla mûcibince keyfiyet Başmuhâsebe’ye kayd ettirilerek nâzır-ı müşârun-ileyh hazretleriyle harameyn müfettişi fazîletli efendi taraflarına ve sâir iktizâ eden mahallere ilmuhaberlerinin i‘tâsı sûreti icrâya mübâderet olunmak bâbında beyâz üzerine sâdır olan fermân-ı âlî mûcibince Başmuhâsebe’ye kaydolunarak lâzım gelen mahallere ilmuhaberleri tahrîr ve i‘tâ olunmak fermân buyrulmağın mûcibince kaydolunup iktizâ eden mahallere başka başka ilmuhaberleri tahrîr ve i‘tâ olunmağla keyfiyet irâde-i seniyye-i mülûkâne ma‘lûm ve îcâbı icrâsına mübâderet ve dikkat olması için İstanbul kādısı fazîletli semâhatlü efendi hazretleri taraflarına dahi işbu ilmuhaber kāimesi verildi. Fî 3 min Za sene 1243