İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 362 Hüküm no: 182 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Savaşa hazırlık olarak İstanbul’da eli silâh tutanların tespit edilerek eğitimden geçirilmesi Âsitâne ve bilâd-ı selâse mahalle ahâlîleri tahrîri bâbında Bâ-sahh-ı âlî İstanbul kādısı fazîletli efendi Dersa‘âdet ve Üsküdar ve Eyüb ve Galata ve Boğaziçi’nde olan bi’l-cümle ehl-i İslâm’ın on iki yaşından kırk yaşına kadar olanları bundan akdem me’mûrlar ma‘rifetleriyle takım takım defter ettirilmiş ise de bunların işe yarayıp yaramayacakları henüz ma‘lûm olmayıp ve merâsim-i ihtiyâta ri‘âyete o makūle defter olanların içlerinden ne mikdâr işe yarayacakları var ise anlaşılmak ve lillâhi’l-hamd lede’l-hâce müdâfa‘a-i düşmana elverir asâkir-i İslâmiye ve nüfûs-ı kesîre mevcûd ise de ahâlîden ekserîsinin esliha isti‘mâliyle ülfetleri olmamak cihetiyle hasbe’l-vakt ve’l-hâl bunların dahi bir taht-ı râbıtada bulunmaları ve meselâ aralık aralık ve takım takım sahrâlara çıkarılarak kuru sıkı tüfenk ve piştov doldurup atmaklığı ta‘lîm ve ta‘allüm ettirilmeleri lâzimeden ve bu cihetle mahallât ahâlîsinin hâl ve hey’etleri bilinmek için imâmlarıyla berâber günde üçer dörder mahalle takımı Bâb-ı Seraskerî’ye gelip sa‘âdetlü serasker paşa hazretleri ma‘rifetiyle içlerinden işe yararları başkaca defter olunması iktizâ-yı hâlden olmak mülâbesesiyle keyfiyet hâk-i pây-ı hümâyûn-ı şâhâneden istîzân olundukda husûs-ı mezbûrun serasker-i müşârun-ileyhle tarafınıza ihâlesi husûsuna irâde-i seniyye-i mülûkâne ta‘allukuyla ol bâbda hatt-ı şerîf-i kerâmet-redîf-i tâc-dârî tırâzende-i sahîfe-i sudûr olmuş ve her ne kadar mukaddem Üsküdar ve Eyüb ve Galata ve Boğaziçi tarafları bilâd-ı selâse kādıları efendiler ma‘rifetleriyle tahrîr ve defter ettirilmiş ise de bu def‘a mahâll-i merkūme e’immesine sizin tarafınızdan tenbîh ve icrâ olunmak üzere keyfiyet beyâz üzerine fermân-ı âlî ısdârıyla [66a] serasker-i müşârun-ileyhe ifâde olunmuş olmağla keyfiyeti siz dahi bi’l-cümle mahallât imâmlarına bi’l-ifâde cümle ahâlî-i mahalle ile günde üçer dörder mahalle takımının Bâb-ı Seraskerî’ye gitmelerini tenbîhe mübâderet eyleyesin deyü buyruldu. Fî 6 min Z sene 1243