İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 364 Hüküm no: 185 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koyun eti fiyatının tespiti Lahm-ı ganem narhı İstanbul kādısı fazîletli efendi Dârü’l-hilâfeti’l-aliyyede sâkin ve mütemekkin olan tâife-i ibâdullâhın ez-her cihet refâh-ı hâl ve arâmiş-i bâlleri akdem-i merzâ-i âlî ve bu ümniye-i hayriyenin husûlü dahi her bir şeyin vakit ve mevsimine göre fiyat-ı mu‘tedile üzere bey‘ ve şirâsına menût idüğü zâhir ve bedîhî olmak hasebiyle lahm-ı ganemin beher vakıyyesinin mukaddemce otuz sekiz paraya satılmasına müsâ‘ade olunmuş ise de lillâhi’l-hamd ve’l-minne el-hâletü hâzihî mevsim sayf olup ağnâmın kesret ve vefret üzere bulunması cihetiyle gerek ibâdullâha ve gerek kasab esnâfına ve celebâna zarâr olmayacak vechile fiyat-ı mezkûrenin biraz tenzîli lâzım gelmiş ve ol vechile mukaddemki fiyatın üç parasının tenzîliyle beher kıyye lahm-ı ganemin bundan böyle kasab esnâfı celebden otuz iki para hesâbıyla alıp otuz beşer paraya satılması tensîb ve irâde kılınmış olmağla imdi iktizâ edenleri nezdinize celb ile keyfiyeti tefhîm ve inbâ ve fîmâ-ba‘d lahm-ı ganemin beher kıyyesinin otuz beşer paradan ziyâdeye satılmaması zâbıtasının istihsâline ale’d-devâm ihtimâm ve i‘tinâ eyleyesiz deyü Fî 10 min-M sene 1244