İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 365 Hüküm no: 186 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avarız vergisinin toplanması Avârız fermânı Akzâ kuzâti’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi’l-inâyeti’l-Meliki’l-Mu‘în mevlânâ İstanbul kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Hazîne-i âmirem defterleri mûcibince İstanbul kazâsının iki bin altı yüz doksan beş buçuk ve bir sülüs avârızhânesi olup bin iki yüz kırk dört senesine mahsûben cem‘ ve tahsîli lâzım gelmeğin der-uhde olunup yedine mühürlü ve nişanlı mevkūfât defteri sûreti mûcibince cem‘ ve tahsîl ettirilmek fermânım olmuşdur. Buyurdum ki hükm-i şerîfimle mübâşir vardıkda bu bâbda sâdır olan emrim üzere amel edip dahi sene-i merkūma mahsûben kazâ-i mezbûrun ol mikdâr avârızhânesi olup Tersâne-i âmirem ocaklığı olmağla beher hânesinden dörder yüz yirmi dokuz akçe kürekçi bedelleri irsâl olunan mühürlü ve nişanlı mevkūfât defteri sûreti mûcibince vakt ü zamânında yerli yerinden cem‘ ve tahsîl ve dâhil-i Tersâne-i âmirem ettirip hilâf-ı emr u defter kimesneye ta‘allül ve muhâlefet ettirmeyesin deyü bundan mâ‘adâ mübâşir-i merkūmun cihet-i ma‘âşı için her bir avârızhânesinden otuzar akçe ve on beşer akçe harc Tersâne-i âmirem için aldırılıp ve avârız için alınan akçenin her yüz on akçesinden bir esedî guruş tahsîl olup ve hîn-i tahsîlde mîrî için alınan akçeyi Hazîne-i âmireme aldığı vech üzere aldırıp bundan ziyâde ve noksan alınmaya ve aldırmayasın kesr-i defterden ve nakz-ı hâneden ve fermân-ı âlîşânımdan ziyâde mutâlebesi ile re‘âyâ fukarâsına zulm ve te‘addî olunmakdan gāyetü’l-gāye ihtirâz ve ictinâb eyleyesin, şöyle bilesin, alâmet-i şerîfeme i‘timâd kılasın. Fî 10 M sene 1244