İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 367 Hüküm no: 188 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asâkir-i Mansûre için fırın yaptırılması Asâkir-i Mansûre’ye bir göz fırın inşâsına dâir Bâb-ı Seraskerî’de ve Davudpaşa kışlağında olan Asâkir-i Mansûre-i Muhammediye’ye verilen nân-ı azîz ta‘yînâtları Dersa‘âdet’de kâin Kantarcılar fırını ekmekçisi Mikail zimmî ma‘rifetiyle fırın-ı mezkûrede tabh ile verilmekde ise de hamden lillâhi te‘âlâ sâye-i hümâyûn-ı mülûkânede Asâkir-i Mansûre-i Muhammediye gün be gün tekessür etmekde olduğundan bir göz fırında iktizâ eden ekmek tabh ettirilmesinde usret çekdiğinden diğer bir fırın dahi tedârik olunsa ta‘yînâtın sühûleti verilmesi esbâbı istihsâl kılınacağı ve âhar mahalde başka fırın tahsîs olunmakdan ise fırın-ı mezkûrun ittisâlinde olup hâlâ mersûmun üzerinde olan arsaya bir göz fırın binâ ve ihdâs olunsa ve lüzûmu olduğu hâlde birkaç taş dahi ilâve kılınsa teshîl-i maslahatı mûcib olacağı mersûm tarafından haber verilmiş olup nizâmen mahzûru yok ise mersûm tarafından arsa-yı mezkûreye bir göz fırın yaptırılmak ve iktizâsı olduğu sûrette birkaç taş dahi ilâve kılınmak üzere tanzîmi husûsu re’y-i âlîye menût mevâddan idüğü sa‘âdetlü atûfetlü serasker paşa hazretleri atûfetlü nâzır efendi hazretleri bi’l-iştirâk takrîriyle inhâ etmeleriyle iktizâsı İstanbul kādısı fazîletli efendi hazretlerinden lede’l-isti‘lâm ber-mantûk-ı takrîr Kantarcılar ittisâlinde kâin fırın-ı mezkûr ustası Mikail zimmînin bi’l-icâreteyn tasarrufunda olan arsa Asâkir-i Mansûre ekmeği tabh için mersûm tarafından bir kıt‘a fırın binâ ve birkaç taş ilâvesinde bir gûne mahzûr olmadığı i‘lâm eylediğine binâen mûcibince kuyûda mürâca‘at ve iktizâsı suâl olundukda Bâb-ı Seraskerî ve Davudpaşa kışlağında olan Asâkir-i Mansûre’ye verilen nân-ı azîz ta‘yînâtlarının tabhı lâzimesi için habbâz-ı mersûmun Dersa‘âdet’de Kantarcılar içinde beş aded ve Tavukpazarı nâm mahalde beş horoslu iki bâb fırında on aded horosu olmağla bu sûrette asâkir-i mezkûrenin ta‘yînât husûsunda kayd-ı zarûretden vâreste ve masûn olmaları ferâiz-i câlibeden olduğuna binâen habbâz-ı mersûmun Tophane-i âmire misillü tabh ve tevzî‘ edip bi-mennihî te‘âlâ ta‘yînât-ı mezkûre tekessür buldukça horos ilâve ile fîmâ-ba‘d zarâr ve ziyân iddi‘âsıyla cânib-i mîrîden nesne mutâlebe etmemek şartıyla ber-mûceb-i takrîr ve i‘lâm bir bâb fırının binâ ve inşâsı için yedine sûret i‘tâsı iktizâ eylediği Navul Kalemi’nden derkenâr olmağla derkenâr olduğu üzere şürût-ı mezkûr üzere sûret i‘tâsı husûsu telhîs olundukda mûcibince sûreti i‘tâ olunmak bâbında sâdır olan fermân-ı âlî mûcibince kaydolunup habbâz-ı mersûm yedine sûreti verilmekle keyfiyet ma‘lûm olunmak için İstanbul kādısı fazîletli semâhatlü efendi hazretleri tarafına işbu ilmuhaber verildi. Fî 19 R sene 1243