İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 368 Hüküm no: 189 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rami Çiftliği çevresine yerleştirilecek ordu için çarşı kurulması Ordu çarşısı emri İstanbul kādısı fazîletli efendi Bi’n-nasr ve’l-iclâl mevkib-i hümâyûn-ı hazret-i şâhâne ile Rami Çiftliği ve havâlîsine ihrâc buyrulacak Ordu-yı Hümâyûn-ı zafer-makrûn-ı cenâb-ı tâc-dârîde tahaşşür edecek sunûf-i asâkir-i nusret-me’serin malzeme-i mukteziyye tedârikinde zarûret çekmemeleri için mu‘tâd-ı kadîm üzere ordu çarşısı tertîb ve tanzîm olunması lâzım gelmiş olduğundan çiflik-i mezkûr civârında vâki‘ Topçular nâm mahal kurbünde gösterilen mahalle ordu çarşısı nasbı zımnında her bir esnâfdan münâsibi mikdârının tertîb ve ihrâcları husûsu atûfetlü serasker paşa hazretleri cânibinden inhâ ve beyân olunmuş ve keyfiyet beyâz üzerine fermân-ı âlî ısdârıyla ihtisâb ağasına tenbîh kılınmış olmağla imdi ber-minvâl-i muharrer mu‘tâd-ı kadîm olduğu vechile Ordu-yı Hümâyûn çarşısı olmak üzere her bir esnâfdan mikdâr-ı kifâye tertîb ve ağa-yı mûmâ-ileyhle bi’l-müzâkere mahâll-i mezkûra ihrâcları râbıtasını tanzîme mübâderet eyleyesiz deyü Fî 16 S sene 1244