İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 368 Hüküm no: 190 Orijinal metin no: [67a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. On ikilik altının kaç guruştan alınıp satılacağı ve diğer eski altınların alınıp satılmasının yasak olduğu Kadîm altın ve ecnâs yasağı İstanbul kādısı fazîletli efendi Kâffe-i mu‘âmelâtın üss-i esâsı ve mülk-i milletin mebnâsı meskûkât-ı hasene-i şâhâne husûsu olarak işbu meskûkâtın râdde-i müstekarrasından ziyâdeye tedâvül eylememesi emrine dâimâ kemâl-i ihtimâm ve dikkat olunmak vâcibât-ı umûrdan olduğuna mebnî bundan akdem şeref-efzâ-yı sudûr olan irâde-i seniyye-i şâhâne mûcibince Darbhâne-i âmirede kat‘ ve darbı külliyyen terk olunmuş olan on ikilik altının fiyat-ı mukarreresi olan tammı on iki ve nısfı altı ve rub‘u üç guruşa olarak tedâvül edip ziyâdeye alınıp verilmemesi ve ziyâdeye alıp veren olur ise bi’t-tahkīk o makūlelerin tedîbât-ı lâyıkaları icrâ kılınması ve külliyyen revâcı memnû‘ olan sâir atîk ecnâs-ı altın ve beyâz akçe dahi alınıp verilmeyip her kimin yedinde bulunur ise sikke-i hasene-i cedîdeye tebdîl kılınması [67b] ve ziyâdeye alıp veren olur ise tedîbât-ı lâzimesi kezâlik icrâ olunması irâde-i seniyye-i şâhâne muktezâsından olarak mukaddemâ beyâz üzerine fermân-ı âlî ısdârıyla keyfiyeti cümleye i‘lân olunmuş iken el-hâletü hâzihî ba‘zı habâsetkârlar tama‘-ı hâmlarından nâşî on ikilik altını ve nısf ve rub‘unu Dersa‘âdet’ten devşirip taşra memâlike göndermekde ve sâir memnû‘ olan ecnâs-ı atîk altın ve beyâz akçeyi dahi fiyat-ı fâhişe ile ber-vech-i hafî beynlerinde alıp vermekde oldukları bu def‘a sahîhan tahkīk ve istihbâr olunmuş olup ancak o makūle müfsid ve habâsetkârların on ikilik altını devşirerek taşra memâlike göndermeleri irâde-i seniyyenin hilâfı olacağından başka bu husûs Darbhâne-i âmirenin umûr-ı mu‘tenâsından olan i‘mâlât maddesinin bi’l-vücûh durgunluğunu müeddî olacağı derkâr ve bu maddenin evvelce bir çâresine bakılması derece-i vücûbdan idüğü âşikâr olarak bu husûsun önü kesdirilmesi lâzım gelmiş olduğundan ba‘d-ez-în muhtekir ve habâsetkâr makūleleri on ikilik altınını Dersa‘âdet’ten devşirip taşra memâlike gönderirler ve sâir ellerine geçen atîk ecnâs-ı altın ve beyâz akçeyi dahi Darbhâne-i âmireye getirip sikke-i hasene-i cedîdeye tebdîl ettirmeyip fiyat-ı fâhişe ile alıp verirler ve kezâlik Dersa‘âdet’ten devşirip taşra memâlike irsâl ederler ise o makūleler Darbhâne-i âmire me’mûrları ma‘rifetleriyle bi’t-tahkīk ele geçdikde her kim olur ise olsun hâtır ve gönüle bakılmayarak yedlerinde bulunan on ikilik ve sâir atîk altın bi’l-müsâdere ahz u zabt olunacağından mâ‘adâ yalnız müsâdere ile iktifâ olunmayıp kendileri dahi bilâd-ı ba‘îdeye nefy ve iclâ ve belki haklarında mu‘âmele-i âhar olunacağı irâde-i seniyye îcâbından olarak bu def‘a dahi keyfiyet bilâd-ı selâse kādıları fazîletli efendiler hazarâtı ile sâir iktizâ edenlere beyâz üzerine başka başka fermânlar ısdârıyla tenbîh ve tekîd olunmuş olmağla siz dahi bi’l-cümle eimme-i mahallâtı celb ve keyfiyeti mahalleleri ahâlîsine ifâde ve tenbîh eylemek üzere sûret-i me‘âli gûş-i hûşlarına tefhîm ve ilkāya mübâderet eyleyesiz deyü. Fî 26 S sene 1244