İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 370 Hüküm no: 191 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmeklik buğdayın özelliklerinin tespiti Nân-ı azîze dâir İstanbul kādısı fazîletli efendi El-hâletü hâzihî zahîre anbarlarında mahlût hınta kalmayıp mevcûd olan zahîre müste’men tüccârından mübâya‘a olunmak Rusya hıntası ve Tekfurdağı ve mahâll-i sâireden bi’t-tertîb tevârüd etmekde olan râyic hıntasıyla atîk müdahhar bulunan erzenden ibâret olup bunların fiyatları tükenmiş olan zehâirden ziyâdece olduğundan bundan böyle işbu mevcûd zehâirden tabh olunacak nân-ı azîzin usûl-i sâbıkāya tatbîkan yüz yirmişer dirhem olarak tabhı takdîrinde cânib-i mîrîye hasârı müeddî olacağından bahisle müceddeden çaşni tutulmak lâzım geldiğini zahîre nâzırı ağa bâ-takrîr ifâde etmiş ve tarafınıza havâle olundukda lâzım gelenler ma‘rifetiyle tutulan numûneye göre nân-ı azîzin dirhemi el-hâletü hâzihî mer‘î olan dirhem üzere ibkā olunduğu hâlde tevzî‘ olunacak ecnâs-ı zehâir mübâya‘a olunan fiyat üzere bahâsını habbâzân esnâfı edâya kudret-yâb olamayacakları ve dûn bahâ takdîr olunsa Zahîre Hazînesi’ne hasârı müeddî olacağı tebeyyün etmiş olduğundan tutulan numûnenin sikkesine göre ta‘dîl ve tesviyesi menût-ı re’y-i âlî idüğü tarafınızdan i‘lâm olunmuş ve beher hafta Anbâr-ı âmireden sâlifü’z-zikr hıntaya yedişer bin beşer yüz keyl erzen ilâve olunarak fiyat-ı muhtelife üzere îcâb eden bahâsına göre tabh olunacak nân-ı azîzin beher doksan dirhemi dörder paraya olmak lâzım geleceği tutulan numûneden tebeyyün etmiş olduğu huzûr-ı hümâyûn-ı hazret-i mülûkâneye lede’l-arz numûnenin tebdîl ve tağyîr olunmayarak böylece sikkesi bozulmayıp tabh olunmasına dikkat olunmak üzere tanzîm ve tesviyesine irâde-i seniyye-i şâhâne ta‘allukuyla ol bâbda hatt-ı şerîf-i tâc-dârî levha-i zîb-i sudûr buyrulmuş ve numûne-i mezkûr tarafınıza gönderilmiş olmağla hatt-ı hümâyûn-ı şevket-makrûn-ı şâhâne mantûk-ı münîfi üzere bundan böyle tabh olunacak nân-ı azîz ber-minvâl-i muharrer tutulan numûnenin aynı olarak tabh ve i‘mâline ale’d-devâm dikkat ve hilâfı hareketten be-gāyet ictinâb ve mübâ‘adet olunmasını ağa-yı mûmâ-ileyhle bi’l-müzâkere iktizâ edenlere tenbîh ve tekîde mübâderet eyleyesin deyü Fî 16 Ra sene 1244