Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 399 Hüküm no: 466 Orijinal metin no: [75a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma b. Abdullah’ın Hasan b. Şaban’dan muhâlaa yoluyla boşandığı Mahmiye-i İstanbul’da Hoca Hayreddin mahallesinde sâkine olup zâtını ma‘rifet-i şer‘iyye ile ârifân olan Hüseyin b. Şaban ve Ebûbekir ibn Hüseyin nâm kimesneler ta‘rîfleri ile mu‘arrefe olan Fâtıma bt. Abdullah nâm hâtun meclis-i şer‘-i şerîfde zevc-i dâhili bâ‘isü hâze’l-kitâb Hasan b. Şaban nâm kimesneler mahzarında bi tav‘ihâ ikrâr-ı tâm ve takrîr-i kelâm edip zevcim mezbûr Hasan zimmetinde mütekarrir ve ma‘kūdun-aleyh olan bin beş yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerine ve me’ûnet-i süknâm kendi üzerime olmak üzre zevcim mezbûr Hasan ile muhâla‘a-i sahîha-i şer‘iyye ile muhâla‘a olup ol dahi muhâla‘a-i mezbûreyi kabûl eylediğinden sonra hukūk-ı zevciyyete müte‘allika da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hüseyin b. Şaban, Ebûbekir b. Hüseyin, İsmail Çelebi b. Mehmed, Mehmed b. Abdullah.