Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 400 Hüküm no: 467 Orijinal metin no: [75a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hatun’un Selim Çelebi b. Ebûbekir’den muhâlaa yoluyla boşandığı Mahmiye-i İstanbul’da Sancakdar Hayreddin mahallesinde sâkinelerinden olup zâtını ma‘rifet-i şer‘iyye ile ârifân Mehmed Efendi b. İbrahim ve es-Seyyid Mehmed Çelebi b. Ali ta‘rîfleriyle mu‘arrefe olan Ayşe Hâtun meclis-i şer‘-i şerîf-i enverde zevc-i muhâlı‘ı işbu bâ‘isü’l-kitâb Selim Çelebi b. Ebûbekir nâm kimesne mahzarında ikrâr ve takrîr-i kelâm edip zevcim mezbûr Selim Çelebi zimmetinde mütekarrir ma‘kūdun-aleyh olan dört bin akçe mehr-i müeccelim ve nafaka iddet-i ma‘lûme üzerlerine ve me’ûnet-i süknâm dahi kendi üzerime olmak üzre zevcim mezbûr Selim Çelebi ile muhâla‘a-i sahîha-i şer‘iyye ile muhâla‘a edip ol dahi hul‘u kabûl eyledikden sonra ben hukūk-ı zevciyyete ve zimmetimde olan altmış beş guruşa târih-i kitâba gelince beynimizde cereyân eden sâir ahz u i‘tâya müte‘allika âmme-i da‘vâdan mezbûr Selim Çelebi’nin zimmetini ve merkūm Selim Çelebi dahi hukūk-ı zevciyyete ve târih-i kitâba gelince beynimizde cereyân eden sâir ahz u i‘tâya müte‘allika âmme-i da‘vâdan benim zimmetimi ibrâ-i âmm-ı kātı‘ü’n-nizâ‘ ibrâ ve iskāt eyledik min ba‘d birbirimiz ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ali Efendi b. Sâlih, Hasan b. Mustafa, el-Hâc Ali b. Muharrem, Şaban b. Osman.