İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 371 Hüküm no: 193 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya ile savaş halinde olunduğundan seferberlik göstergesi olarak herkesin başına şal sarması ve şalvar giymesi Şâl yasağı İstanbul kādısı fazîletli efendi Cümleye ma‘lûm olduğu üzere düşman-ı dîn-i mübîn ve mühîn-i Devlet-i aliyye-i ebed-rehin olan Moskovlu gâvuru ümmet-i Muhammed aleyhine taraf taraf mütecâsir olduğu ihânet ve mel‘anet cihetiyle bi-havli’llâhi te‘âlâ def‘-i şürûr ve mekîdet ve hıyânetleri zımnında sû be-sû Ordu-yı Hümâyûn ve asâkir-i nusret-makrûn sevk ve i‘zâm olunmuş ve hattâ şevket-meâb-ı kerâmet-nisâb -eyyede’llâhu umrehû ve satvetehû ilâ-yevmi’l-hesâb- efendimiz hazretleri dahi mücâhedât-ı seferiyeyi ihtiyâr ile bi’ş-şevketi ve’l-iclâl Rami Çiftliği’ne sâye-i bahş-i devlet ve ikbâl buyurmuş olduklarına binâen mecmû‘-ı ümmet-i Muhammed’in dahi vakt ü hâl iktizâsınca hazariyeti bi’l-külliye terk ile esbâb-ı bedeviyeti istihsâl ve ikmâl eylemek garazıyla herkesin başlarına şal sarmaları ve şalvar giymeleri husûsuna irâde-i seniyye-i şâhâne ta‘alluk ederek ol vechile cümlemiz usûl-i seferiyeyi icrâ eylemiş isek de el-hâletü hâzihî ketebeden ve sâir efrâd-ı nâsdan ba‘zı süfehâ işbu irâde-i hayriyeyi kendi mezâkları icrâsına ser-rişte ittihâzıyla hâric ez-tavr-ı edeb sefîhâne hey’et ve kıyâfetle cübbe ve binişsiz esvâk ve pazarlarda geşt ü güzâr etmekde oldukları meşhûd olup hâlbuki cemî‘-i zamânda sefîhâne tavır ve kıyâfet mehâzîr-i müte‘addideyi müstelzim olduğu zâhir ve âşikâr ve bu irâde-i hayriyeden aksâ-yı murâd mücerred hazariyeti terk ile bedeviyet ve seferiyeti ihtiyâr ve iltizâmdan ibâret idüğü müsellem ve bedîdâr olmağın siz bi’l-cümle eimme-i mahallât ve sâir îcâb edenleri nezdinize celb ve istihzâr ile fîmâ-ba‘d yine mecmû‘-ı nâs ber-minvâl-i muharrer hey’et-i seferiyede oldukları hâlde sefîhâne tavır ve kıyâfet ile gezmemelerini mahalleri ahâlîsine ifâde eylemelerini yegān yegān beyân ve tenbîhe dikkat ve siz dahi dâimâ bu husûsa ikdâm ve nezâret eyleyesiz deyü Fî 15 R sene 1244