İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 379 Hüküm no: 202 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asâkir-i Mansûre binbaşı ve diğer zabitlerinin ne şekilde giyineceği ve kadınların çarşı ve pazarlarda boş yere dolaşmaması gerektiği Harvânî ve kukulata iktisâsına ve sâir mesâğ-ı örfîye dâir İstanbul kādısı fazîletli efendi Ma‘lûmunuzdur ki Asâkir-i Mansûre-i Muhammediye binbaşı ve sâir ba‘zı zâbitânı harvânî iktisâ etmekde iseler de bu def‘a kerâmet-efzâ-yı sudûr buyrulan irâde-i seniyye-i şâhâne mûcibince vüzerâ-i izâm ve ricâl ve hâcegân ve kapıcıbaşı ve silâhşor ve zü‘amâ misillü erbâb-ı resimden olan hademe-i Devlet-i aliyye-i ebed-kıyâm dahi eski kıyâfetlerini terk ile fes ve harvânî ve kukulata iktisâ eylemeleri ittifâk-ı ârâ ile karâr-gîr olarak sûreti irâde-i aliyye-i mülûkâne her bir tarîk zâbitân ve rüesâsına bildirilmiş olduğundan o misillülerin hâric ez-dâire-i irâde hareket eylememeleri lâzimeden iken bu esnâda ba‘zı kimesneler sarı ve emsâli açık renk çukadan harvânî müzeyyen ya‘ni sırma ve ba‘zan altın hurclu kukulata iktisâ eylemekde ve ba‘zı mecma‘-ı halâyık olan mahallerde tâife-i nisvân dahi uygunsuz kıyâfetler ile gezmekde oldukları meşhûd ve hâlbuki ol vechile tebdîl-i kıyâfet ve ihtiyâr-ı usûl-i bedeviyetden murâd-ı âlî herkesin bir müddetden beri mübtelâ oldukları seref-i sefâhatden ferâgat ile tarz-ı mergūb üzere hareket eylemeleri kaziyye-i hayriyesinden ibâret olduğu zâhir ve rû-nümûd olmak ve tâife-i nisvânın öyle bî-muhâbâ uygunsuz kıyâfetler ile gezmeleri bir vechile câiz olmamak hasebiyle fîmâ-ba‘d harvânî iktisâsına tarîkınca mesâğ bulunan kesân ile açık renk harvânî giymemeleri ve ku[ku]lata giyenler dahi ziynetli ve fâhiş hurclu kukulata iktisâ eylememeleri ve tâife-i nisâ dahi mecma‘-ı halâyık olan Sultan Bayezid ve Sultan Mehmed ve Sultan Ahmed ve Ayasofya ve sâir bu misillü kalabalıklı mahallerde arabalı ve arabasız seyir tarîkiyle gezmemeleri ve uzun yakalı ferâce giymemeleri ve içlikli yaşmak tutmaları ve çarşı ve pazar ve ale’l-husûs dülbendciler ve haffâflar çarşısında ve sâir dükkânlar önlerinde oturmayıp îd-i şerîf takarrubu cihetiyle eğer işleri var ise ayakdan alış-verişini edip hânelerine gitmek ve koçular ile sokaklarda bilâ-mûcib eğlenmemeleri ve bu sene-i mübârekede Hırka-i Şerîf ziyâreti yalnız zükûra mahsûs olarak tâife-i nisvânın men‘ olunmaları husûslarına irâde-i seniyye-i şâhâne ta‘alluk ederek ol bâbda hatt-ı hümâyûn-ı mülûkâne şerefrîz-i sahîfe-i sudûr olmuş ve keyfiyet îcâb edenlere başka başka buyruldular ısdârıyla tenbîh olunmuş olmağla siz dahi bu husûsları iktizâ edenlere müekked tenbîh ile ba‘d-ez-în öyle herkesin harvânî ile ve bi’l-husûs askerî kıyâfetinde gezmemeleri ve harvânî iktisâsına tarîkınca ruhsat verilenler dahi açık renk giymeyip ve kukulata giyenler dahi müzeyyen ve fâhiş hurclu iktisâ etmeyip tavr-ı edîbâne ile gezmeleri ve nisvân makūlesinin dahi mahâll-i mezkûrede ve sâir esvâk ve pazarda mûcibsiz dükkânlar önlerinde işlememeleri ve akşamdan sonra câmi‘ye ve birbirlerine gitmemeleri esbâbının istihsâline ve geceleri hiç kimesnenin fenersiz gezmemeleri husûsuna ale’d-devâm dikkat ve nezâret eyleyesiz deyü. Fî 13 N sene 1244