İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 380 Hüküm no: 203 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Herkesin kendi ihtiyacı olan zahîreyi İstanbul dışından temin edebileceği Taşradan Âsitâne’ye erzâk celbi husûsuna dâir İstanbul kādısı fazîletli efendi Bi-takdîri’llâhi te‘âlâ bu sene-i mübârekede zahîrenin kılleti cihetiyle Dersa‘âdet sekenesinin nân-ı azîz husûsunda meşakkat ve zarûret çekmekde olduklarından tevsî‘-i dâire-i inti‘âşları esbâbının istihsâline sa‘y u gayret olunmakda olup hattâ bundan akdem Tekfurdağı misillü mahallerde mevcûd zehâir ve erzâkın narhsız fürûhtuna müsâ‘ade kılındığı i‘lân olunarak celbi bâbında takayyüdât-ı mukteziyye icrâ olunmuş olduğundan etrâfdan kendi dilekleri ile zehâir ve sâir erzâkı getirenler çarşı ve pazarda ve mecma‘-ı nâsda fürûht etmiş olduklarından bâyi‘ ve müşteriye fâideyi mûcib olduğu âşikâr ve Dersa‘âdet ahâlîsinin ekserîsinin Bursa ve Tekfurdağı ve sâir civâr-ı saltanat-ı seniyyede vâki‘ mahallerde ve mahâll-i sâirede eş ve dostları ve alâka ve münâsebetleri olduğundan Âsitâne-i sa‘âdet sekenesinden murâd edenler mahâll-i mezkûreden kendilerine lüzûmu olan zehâir ve sâir erzâkı adam gönderip ve mektûb irsâliyle celb etmek ve yâhud kendisi varıp tedârik ederek getirmek ve’l-hâsıl kendi istekleriyle ahâlî-i merkūmenin kendilerine lâzımlı olan pirinç ve hınta ve dakīk ve sâir erzâk ve zahîrenin celbine müsâra‘at etmeleri sûretinde muhassenât-ı adîde derkâr olduğundan bu vechile ruhsat verilmiş ve milel-i selâseden dahi bu usûl üzere münâsib mahallerden kendilerine lüzûmu olan erzâkı celb eylemeleri Ermeni ve Rum patrikleri ve hahambaşıya tenbîh olunmuş olmağla eimme-i mahallâtı celb ile istekli olanlar zikr olunan mahallerden ve sâir yerlerden ol vechile kendilerine lüzûmlu olan zehâir ve erzâk celb etmelerinde bir beis olmadığını ve getirdiklerinde kimesne tarafından müdâhale olunmayacağı mahalleleri ahâlîsine güzelce ifâde ve tefhîme mübâderet etmelerini tenbîhe ve himmet eyleyesiz deyü. Fî 29 N sene [12]44