Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 400 Hüküm no: 468 Orijinal metin no: [75a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hüseyin Ağa b. Mustafa’nın terekesindeki altınların sahiplerine verilmesi Mahmiye-i İstanbul’da Seferikoz mahallesi ahâlîsinden tarîk-i hacc-ı şerîfde Payas nâm mahalde vefât eden el-Hâc Ali b. Abdullah b. Abdurrahman Bey yedinde olan hüccet-i şer‘iyye nâtık olduğu üzre vasiyy-i muhtâr olduğu mütehakkik olan bâ‘isü hâze’l-kitâb el-Hâc Mehmed Ağa b. Ali nâm kimesne meclis-i şer‘-i hatîr-i lâzımü’t-tevkīrde bin doksan altı senesinde küçük sakabaşı iken tarîk-i hacc-ı şerîfde Bedr-i Huneyn’de vefât eden Dalkozlu el-Hâc Hüseyin Ağa b. Mustafa b. Hüseyin’in li üm kız karındaşları ve vârisleri olmağla terekesine vaz‘-ı yed eden Âsiye ve Fâtıma taraflarından vekîl-i müseccelleri olan Ali Efendi b. Yusuf nâm kimesne mahzarında bi’l-vesâye mak[b]ûzum olan yüz altmış üç şerîfî altını merkūm el-Hâc Hüseyin Ağa’ya hayâtında emânet vaz‘ ve teslîm ol dahi ahz u kabz edip hattâ hayâtında ikrâr ettiğinden sonra meblağ-ı mezbûrun on üç altını mukaddemâ bi’l-vesâye ahz u kabz edip bâkī [75b] yüz elli altını kable’t-tesellüm vefât etmekle suâl olunup terekesinden edâya tenbîh olunmak matlûbumdur dedikde gıbbe’s-suâl vekîl-i mezbûr cevâbında müvekkiletân-ı mezbûretânın ber vech-i muharrer tereke-i müteveffâ-yı merkūma vaz‘-ı yedlerini ikrâr lâkin husûs-ı mezkûru inkâr edicek vasiyy-i merkūmdan müdde‘âsını mübeyyine beyyine taleb olundukda udûl-i müslimînden olup mahmiye-i merkūmede Hoca Paşa mahallesi sükkânından el-Hâc Ali b. İbrahim ve Mahmud Paşa mahallesinde sâkin Mehmed Ağa b. Mustafa b. Hüseyin bundan akdem hayâtında işbu vasiyy-i merkūm el-Hâc Mehmed Ağa vasî olduğu müteveffâ-yı merkū[m] el-Hâc Ali b. Abdullah’ın terekesinden yüz altmış üç şerîfî altınını bana emânet vaz‘ ve teslîm ben dahi ahz u kabz eyledim deyû bizim huzûrumuzda ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinden ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebiyle meblağ-ı bâkī-i mezbûr yüz elli şerîfî altınını müteveffâ-yı mezbûr el-Hâ[c] Hüseyin Ağa’nın terekesinden müvekkiletân-ı mezbûretâna edâ etmek üzre vekîl-i mezbûra tenbîh olunmağın mâ vaka‘a bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Ser-muhzırân, el-Hâc Mustafa b. Tevekkül, İbrahim Çelebi b. Ahmed, Ali b. Veli, Mehmed Ağa b. Ahmed.