İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 381 Hüküm no: 204 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhallefatlardan çıkan altın ve gümüşün satılmaması ve görevlisi tarafından kayıt altına alınarak Darbhâne-i Âmire’ye teslim edilmesi Sim ve zerre dâir emr-i âlî İstanbul kādısı fazîletli efendi Cânib-i mîrîden zabt ve Âsitâne-i aliyye ve bilâd-ı selâsede zuhûr ile fürûht olunan muhallefâtlarda bey‘ olunan evânî-i zer ve simi alan kimesnelerin ekserîsi hey’etiyle fürûht etmeyip tama‘-ı hâma teba‘iyet ile hafîce kāl ve izâbe ettirerek kuyumcu esnâfına ve sâir memnû‘ olan mahallere fürûht etmekde oldukları istihbâr ve tahkīk olunmuş olduğuna ve bu husûs Darbhâne-i Âmire nizâmının ihlâlini müeddi olarak men‘i lâzım gelmiş idüğüne binâen fîmâ-ba‘d gerek cânib-i mîrîden zabt ve gerek Âsitâne ve bilâd-ı selâsede zuhûr ile fürûht olunan muhallefâtlarda çıkan bi’l-cümle evânî-i sim ve zerre o makūle muhtekir yedlerine geçmemek için fürûht olunmayarak muhallefât me’mûru tarafından defteriyle doğru Darbhâne-i Âmire’ye irsâl ve kefce-i hümâyûna teslîm ve bi’l-vezn her ne mikdâr sim ve zer-i hâlis zuhûr eder ise râyic fiyatıyla îcâb eden bahâsı Darbhâne-i Âmire’den defter-i mezkûr zeyline ba‘de’l-hesâb ahz olunarak ol vechile muhallefât defterlerine kayd ve terkīm olunmak ve muhtekir makūleleri yine evânî-i zer ve sim iştirâsıyla hafî kāl ve izâbe ettirerek kuyumcu esnâfına ve sâir diledikleri mahallere fürûhta ictisâr eder ise o makūleler Darbhâne-i Âmire me’mûrları ma‘rifetiyle bi’t-tahkīk ele geçdiklerinde her kim olur ise olsun tedîbleri icrâ kılınmak husûsu tensîb ve irâde olunarak iktizâ edenlere fermân-ı âlî ısdârıyla tenbîh olunmuş olmağla imdi husûs-ı mezkûru iktizâ edenlere tenbîhe himmet-birle siz dahi ale’d-devâm nezâret eyleyesiz deyü. Fî 26 Ş sene 1244