İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 381 Hüküm no: 205 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıtlık tehlikesi nedeniyle ekmek satışıyla ilgili yapılan düzenleme Nân-ı azîze dâir İstanbul kādısı fazîletli efendi Dersa‘âdet’de mutavattın ibâdullâhın akvât-ı yevmiyeleri tedârik ve istihsâline dâimâ dikkat ve i‘tinâ olunmakda ve nân-ı azîz tabh ve i‘mâl olunan fırınların mürettebâtı lâyıkıyla i‘tâ kılınmakda ise de bi-hikmeti’llâhi te‘âlâ vukū‘ bulan kaht takrîbiyle bir takım halk kanâ‘at etmeyerek kendilere lüzûmundan ziyâde ekmek almak ve ziyâdesini kurutmak zu‘muyla fırınlar pîşgâhında kalabalık ve şamâtet eylemekde olduklarına binâen bu husûsun bir zâbıta tahtına idhâli lâzım gelerek hem fırınlar kalabalı[ğı]nın def‘i ve hem ibâdullâhın âsâyiş ve rahatı mütâla‘asıyla Dersa‘âdet’de mevcûd hâne ve hânlarda ehl-i İslâm ve re‘âyâ ne kadar nüfûs var ise bilinip ona göre iktizâsınca nân-ı azîzleri herkesin hânelerine ve odalarına götürülüp i‘tâ ettirilmek üzere ma‘rifetiniz ve ihtisâb ağası ma‘rifetiyle mecmû‘-ı hâne ve hânlarda nüfûs hesâbıyla defter ettirilmesi tensîb ve irâde olunmuş ve keyfiyet bâ-fermân-ı âlî mûmâ-ileyh ihtisâb ağasına tenbîh kılınmış ve maslahatda yanlışlık olmamak ve fırınlara gitmekden halkı men‘ olundu deyü başka türlü ma‘nâlara saymamak için işbu fermân-ı âlîşânın irâdesi mahalli herkesin anlayacağı sûretde pusula ettirilip bir sûreti tarafınıza gönderilmiş ve milel-i selâsenin tahrîri husûsu Ermeni ve Rum patriklerine ve hahambaşıya tenbîh olunmuş olmağla siz dahi İstanbul Mahkemesi’nde pusula-yı mezkûrun sûretlerini ihrâc ettirerek eimme-i mahallâtın her birlerine başka başka i‘tâ ve ol vechile ağa-yı mûmâ-ileyh ile bi’l-ittifâk her bir hânede mevcûd ehl-i İslâm’dan ne mikdâr nüfûs var ise hânlarda sâkin olanların bekârları ile ber-vech-i sıhhat defterlerini tanzîm ve serî‘an Bâbıâlî’ye takdîme mübâderet ve bir hânede ehl-i İslâm’dan kaç cân var ise ziyâde haber verilmeyip mevcûda göre sebt-i defter olunmaklığa ve bu husûsun icrâsı mücerred ümmet-i Muhammed’in fırınlar pîşgâhında eziyet çekmemeleri garazına mebnî olmağla şu dakīkayı bir hoşça ilkā ve tefhîme dikkat eyleyesin deyü. Fî 5 L sene 1244