İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 383 Hüküm no: 207 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıtlık nedeniyle ekmek fiyatının artırıldığı 60 dirhem nân-ı azîz dört para İstanbul kādısı fazîletli efendi Bi-hikmeti’llâhi te‘âlâ bu sene-i mübârekede zehâirin kılleti cihetiyle Âsitâne-i şevket-âşiyânede mutavattın ibâdullâhın nân-ı azîz husûsunda dûçâr-ı muzâyaka ve meşakkat olmamaları için bundan akdem Mısır ve Akka taraflarından külliyetli zehâir tertîb olunmuş ve zehâir-i mezkûre İzmir’e gelmiş ise de ba‘zı ârızâya mebnî zehâir-i mezkûrenin İzmir limanından berren nakli îcâbıyla bu cihetle beher kilesine dörder guruş ücret-i nakliye verilerek develer ile Bandırma iskelesine naklolunmakda ve iskele-i mezbûreden Dersa‘âdet’e nakline dahi birer guruş ücret-i nakliye ve mesârifât-ı sâire i‘tâ kılınmakda idüğüne binâen hınta-i mezkûrenin bahâ ve ücret-i nakliyesiyle beher keyli on üçer ve şa‘îrin beher keyli dokuzar guruşa resîde olacağından ve kezâlik el-hâletü hâzihî Anadolu taraflarından tertîb olunan râyic mübâya‘ası fiyatı dahi hasbe’z-zarûre ziyâdece olarak kezâlik ücret-i nakliyeleri dahi hayli akçeye mütevakkıf idüğünden eğerçi sâye-i himâye-vâye-i şâhânede şimdiye kadar Dersa‘âdet’de doksan dirhem nân-ı azîz dört paraya bey‘ olunmakda ise de zehâir-i mezkûrenin bi-mennihî te‘âlâ Dersadet’e vusûlünde bu fiyat ile i‘tâ olunmak lâzım gelse nısf bahâsı husûle gelemeyerek cânib-i mîrîye hasâr-ı küllîyi müstelzim olacağı derkâr ve hâlbuki el-yevm Rumeli ve Anadolu taraflarında olan bi’l-cümle mahallerde işbu kaht cihetiyle kırk elli dirhem nân-ı azîz dört paraya bey‘ ve fürûht olunmakda olduğu mütevâtir ve âşikâr olduğundan bu sûretde hasbe’l-vakt ve’l-hâl taşraya kıyâsen Dersa‘âdet’de dahi altmış dirhem nân-ı azîz dört paraya olduğu hâlde cânib-i mîrî hasârdan ve ibâdullâh dahi zarûretden vâreste olacağı nümûdâr olarak bi-mennihî te‘âlâ ileride feyz ve bereket zuhûruyla zehâirin fiyatı ne mikdâr tenezzül eder ise ol vakit alınacak fiyata göre nân-ı azîz-i mezkûrun yine dirhemi zam ve ilâve kılınmak üzere şimdilik bey‘ olunan nân-ı azîzin ol vechile altmış dirhemi dört paraya olmak üzere tanzîmi husûsuna bu def‘a irâde-i seniyye ta‘alluk etmiş ve ol vechile keyfiyet iktizâ edenlere tenbîh kılınmış olmağla siz dahi keyfiyeti îcâb edenlere bu vechile tefhîme mübâderet eyleyesiz deyü. Fî 10 L sene 1244