İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 384 Hüküm no: 209 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırıncıların uyması gereken kurallar Nân-ı azîze dâir emr-i âlî İstanbul kādısı fazîletli efendi El-hâletü hâzihî tabh ve i‘mâl olunmakda olan nân-ı azîzin kereste ve veznine dikkat olunarak fırınların yevmiye iktizâ eden zahîreleri pâk ve münakkah verilmekde ise de habbâzân tâifesi kemâl-i habâsetlerinden nâşî ba‘zı şey katarak i‘mâl olunan nân-ı azîzin sikkesi uygunsuz çıkmakda olduğu meşhûd ve bu husûsun bir hüsn-i sûrete rabtı lâzimeden idüğü zâhir ve rû-nümûd olarak el-hâletü hâzihî i‘mâl olunmakda olan altmış dirhem nân-ı azîz yine dört paraya olmak üzere bu def‘a i‘tâ olunacak zehâirin nısfı münakkah hınta ve nısfı münakkah şa‘îr verilecek olduğundan siz ekmekçiler kethüdâsını ve nizâm ustalarını ve bi’l-cümle eimme-i mahallâtı nezdinize celb ve işbu buyrulduyu alenen kırâet-birle fîmâ-ba‘d işbu verilecek iki cins pak [ve] münakkah zehâirden i‘mâl olunacak nân-ı azîzi temiz işleyip bir gûne habâset etmemelerini ve eimme-i mahallât dahi beher gün nân-ı azîzin veznine ve kerestesine bakıp ve dikkat edip eğer vezninde noksan ve kerestesinde ve tabhında uygunsuzluk olur ise derhâl tarafınıza götürüp ve kangı fırının ekmeği olduğunu haber verip siz dahi doğru Bâbıâlî’ye irsâl ve ihbâr ile bu husûsa mütecâsir olanların hakkında mu‘âmele-i şedîdenin icrâ olunması ve bir de sabah ve akşam i‘mâl olunacak nân-ı azîzi vakitsiz tabh eylemekde olduklarından bu husûsu dahi habbâzâna bi’t-tenbîh vaktiyle işlemeleri râbıtasının tekîd kılınması husûsuna bu def‘a irâde-i seniyye ta‘alluk etmiş ve keyfiyet beyâz üzerine fermân-ı âlî ısdârıyla bilâd-ı selâse kādıları efendilere dahi başka başka bildirilmiş olmağla ber-minvâl-i muharrer husûs-ı mezbûrun ol vechile ifâdesine mübâderet eyleyesiz deyü. Fî 16 Za sene 1244