Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 401 Hüküm no: 469 Orijinal metin no: [75b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in kocasından kalan malları alması için Yusuf Efendi b. Abdurrahman’ı vekil tayin etmesi Mahmiye-i İstanbul’da İbrahim Çavuş mahallesinde sâkin iken bundan akdem vefât eden el-Hâc İbrahim b. Hüseyin’in verâseti zevceteyn-i metrûketeyni Ayşe bt. Mehmed ve Emetullah bt. ( ) nâm hâtunlar ile sulbiye sagīre kızları Rukiye ve Hatice’ye münhasıra olduğu şer‘an zâhir ve müte‘ayyin oldukdan sonra yine mahalle-i mezbûr sâkinlerinden olup mezbûre Ayşe’nin zâtını ma‘rifet-i şer‘iyye ile ârifân İbrahim Çelebi b. İsmail ve Hasan b. İbrahim nâm kimesneler ta‘rîfiyle mu‘arrefe oldukdan sonra kendi tarafından asâleten ve sagīretân-ı mezbûretânın vâlidesi ve tesviye-i emirlerine kıbel-i şer‘den mansûbe vasîsi olmağla vesâyeten meclis-i şer‘-i şerîf-i enverde işbu bâ‘isü’l-kitâb Yusuf Efendi b. Abdurrahman nâm kimesne mahzarında ikrâr ve takrîr-i kelâm edip zevcim müteveffâ-yı mezbûr el-Hâc İbrahim’in kalîl ü kesîr ve celîl ü hakīr terekesinden bana ve sagīretân-ı mezbûretândan her birine isâbet eden hisse-i irsiyyelerimi müteveffâ-yı mezbûrun terekesine vâzı‘atü’l-yed olan mezbûre Emetullah Hâtun’dan ve sâire vâzı‘atü’l-yed olanlarından taleb [ve] da‘vâ ve husûmet red ve cevâba tarafımdan işbu mezbûr Yusuf Efendi’yi vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve merâsimini kemâ yenbağī edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mustafa Çelebi b. Ahmed Ser-muhzırân, Siyavuş Bey b. Abdullah, Mehmed Çelebi b. Derviş, Mehmed Çelebi b. Derviş.