İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 396 Hüküm no: 217 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacı, hamamcı ve cambaz esnafından odun nakli için hamal beygiri temini Esnâf-ı selâseden 400 re’s hatab hammâlı bârgiri tanzîmine dâir İstanbul kādısı fazîletli efendi Ma‘lûmunuz olduğu üzere el-hâletü hâzihî Dersa‘âdet’de olan bârgir hammâllarının yedlerinde bulunan bârgirleri akall-i kalîl ve bu cihetle ibâdullâh hatab iştirâsıyla naklinde envâ‘-ı meşakkat ve külfete dûçâr olmakda olduğu vâreste-i kayd-ı delîl olup bu husûsun bir hüsn-i sûrete rabt ve tevsîki lâzım gelmiş olduğuna ve Dersa‘âdet’de kâin cânbâz esnâfının yedlerinde mevcûd bârgirleri olup boyacı ve hammâmcı esnâfları dahi kendilerine lüzûmu olan hatabın nakli zımnında beher hâl bârgire muhtâc olduklarına binâen ücretleri hatab müşterisi taraflarından verilmek üzere zikr olunan cânbâz esnâfından yüz re’s ve sâlifü’l-beyân boyacı ve hammâmcı esnâflarından dahi kendi maslahatlarını rü’yet eyledikden sonra ibâdullâhın dahi maslahatlarını görmek için kezâlik ücretleri müşteri taraflarından verilmek üzere esnâfça zikr olunan boyacı esnâfından yüz ve hammâmcı esnâfından iki yüz re’s ki cem‘an esnâf-ı merkūmeden dört yüz re’s bârgirin tedârik ve istihdâm olunması tensîb olunmuş olmağla esnâf-ı merkūme kethüdâlarını nezdinize celb ve keyfiyeti bi’l-ifâde ol vechile dört yüz re’s bârgirin serî‘an tedârik ve tanzîmi husûsuna mübâderet eyleyesiz deyü buyruldu. Fî 20 Muharrem sene 1245