İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 397 Hüküm no: 218 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus saldırısı ihtimaline karşı mahallelerden asker yazılması Cihâd ve gazâya dâir emr-i âlî Sa‘âdetlü atûfetlü serasker paşa hazretleri ve İstanbul kādısı fazîletli efendi Ötedenberü millet-i İslâmiye ve Devlet-i aliyye-i Osmaniye’nin Moskovlu keferesi düşman-ı bed-hâhı olup bu kereki hareketi dahi evvelki seferler gibi olmayıp ma‘âzallâhi te‘âlâ bi’l-cümle ehl-i tevhîd ve îmânı yeryüzünden kaldırmak niyet-i bâtılasıyla memâlik-i İslâmiye’ye taraf taraf hücûm ederek bu esnâda Balkanın beri yüzüne geçip -cenâb-ı hâfız-ı mutlak savn-ı samadâniyesinde masûn buyursun- İstanbul üzerine bî-muhâbâ gelmek fikr-i fâsidinde olduğu tebeyyün etmiş ve mukābele-birle kahr u izmihlâl-i düşman-ı dîne ibtidâr olunmak üzere civâr-ı saltanat-ı seniyyede olan bi’l-cümle ehl-i tevhîd ve îmândan kazâlar ahâlîsinin eli silâh tutanı doğru İstanbul’a gelmek üzere bugünlerde icâleten taraf taraf müekked fermânlar ve mübâşirler isbâl olunmuş olduğundan ehl-i îmân olanlar derhâl silâhını kapıp inşâallâhu te‘âlâ karîben fevc fevc bu tarafa gelecekleri derkâr olup ancak yalnız bununla dahi müdâfa‘a-i düşman maddesi hâsıl olmayacağına düşman-ı dinimiz bâtıl dînleri uğruna fedâ-yı cân ederek çalışmakda olduklarına nazaran küçük ve büyük kâffe-i müminîne gazâ ve cihâd farz olmuş olduğundan artık durup oturmak ve rahat aramak zamânı olmayıp âhir zamân peygamberi Hazret-i Muhammed el-Mustafa -sallallâhu te‘âlâ aleyhi ve sellem- efendimiz hazretlerinin ümmeti olanlar el ve gönül birliğiyle bi’l-umûm Allâh Allâh diyerek semt-i gazâya yürüyüş edecek günler gelmekde olduğundan ve hattâ şevketlü kerâmetlü mehâbetlü kudretlü velî-ni‘metimiz pâdişâh-ı âlem-penâh efendimiz hazretleri dahi mutlakā dîn ve Devlet-i aliyyenin selâmet ve bekāsı ve kâffe-i ümmet-i Muhammed’in tasallut-ı küffârdan necât ve istihlâsı için bi’z-zât ihtiyâr-ı gazâ ve cihâd ile lede’l-iktizâ mâ-bihi’l-iftihâr kâffe-i müminîn olan sancağ-ı şerîfi alıp mukābele-i a‘dâya bi’z-zât azîmet ve teşrîf buyurmak niyet-i kātı‘asında olduklarından işte rûh-ı âlem ve muktedâ-yı ümem-i şehinşâh-ı muzaffer-alem efendimiz hazretleri böyle olunca artık millet-i İslâmiye’nin umûm üzere hareketinin vakit ve mevsimi gelmiş ve bu cihetle bi’l-cümle dîn karındaşlarımız yek-vücûd olduğumuz hâlde ihtiyâr ve alîl olanlardan mâ‘adâsı işbu vatanları ve pâyitaht-ı pâdişâhî olan [76a] İstanbul muhâfazasına kıyâm ve düşman geldiği hâlde kahr u tenkîllerine ikdâm etmek cümlemize farz-ı ayn olmuş olduğuna ve mukaddemâ Dersa‘âdet mahallâtı ahâlîsinin dahi tahrîr ve defter olunması bu kaziyyeye ya‘nî civâr-ı saltanat-ı seniyyede hizmet-i muhâfazada kullanılmak niyetinden ibâret idüğüne binâen siz ki serasker-i müşârun-ileyhsiz her bir mahallenin tahammülüne göre münâsib mikdârı asker tertîb ve ma‘iyet-i seraskerlerine me’mûriyeti irâde olunmağla efendi-i mûmâ-ileyh ma‘rifetiyle ol mikdâr askerin ma‘iyet-i düstûrîlerinde mevcûd bulunmak üzere sûret-i me’mûriyetlerinin tanzîmine müsâra‘at ve siz ki efendi-i mûmâ-ileyhsiz sûret-i irâde-i seniyyeyi güzelce eimme-i mahallâta tefhîm-birle ahâlî-i İstanbul’dan her bir mahallenin tahammülüne göre münâsib mikdârı askerin serasker-i müşârun-ileyh ma‘iyetine me’mûriyetleri husûsunda ikdâmât-ı lâzimeyi icrâya mübâderet eyleyesiz deyü buyruldu. Fî 26 Muharrem sene 1245