İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 399 Hüküm no: 220 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus saldırısı ihtimaline karşı İstanbul ve çevresini savunmak için eli silâh tutanların Davudpaşa sahrasında toplanması Cihâd ve gazâya dâir emr-i âlî İstanbul kādısı fazîletli efendi ve ihtisâb ağası Cümleye ma‘lûm olduğu üzere düşman-ı dîn ü devletimiz olan küffâr-ı hâksâr bir müddetden beri taraf taraf memâlik-i mahrûse-i şâhâneye hücûm ederek def‘-i sâilleri esbâbına herbâr teşebbüs olunmakda ise de bi-hikmeti’llâhi te‘âlâ ayak ayak berilere doğru yaklaşıp civâr-ı saltanat-ı seniyyenin tahaffuz ve hırâseti lâzım gelmiş ve geçende muhâfız-ı hâssa mîr-i mîrân-ı kirâmdan sa‘âdetlü Osman Paşa yedi sekiz bin mikdârı piyâde ve süvâri asâkir-i nusret-me’ser ile Kırkkilise ve Edirne civârlarında geşt ü güzâr etmek ve îcâb eden mahalle erişmek üzere me’mûr ve irsâl kılınmış çend rûz mukaddem dahi mahallât ahâlîsinden dergâh-ı âlî kapıcıbaşılarından Musa Ağa ma‘iyetiyle Karaburun muhâfazasına yedi sekiz yüz mikdâr asâkir gönderilmiş olup ancak el-hâletü hâzihî gerek Karaburun ve sâir civâr-ı saltanat-ı seniyyenin muhâfazası zımnında şu günlerde dahi biraz asâkir irsâli lâzım gelmiş olarak mâdem ki düşman-ı dinimiz bu vechile üzerimize hücûm ederek şu günki günde eli silâh tutan her bir müminîn-i muvahhidîne fî-sebîli’llâhi te‘âlâ cihâd ve gazâ farz-ı ayn olmuş olmağla imdi Dersa‘âdet sekenesinden olan gerek mahallât ahâlîsinden ve gerek umûr-ı mühimmede müstahdem olsun ve olmasın bi’l-cümle esnâf gürûhundan kâffe-i harb u darb erbâbının cihâd-ı fî-sebîli’llâhi te‘âlâ niyet-i hâlisesiyle Davudpaşa sahrâsında tecemmu‘ edip vezîr-i mükerrem sa‘âdetlü atûfetlü serasker paşa hazretleri ma‘rifetiyle ta‘yîn olunacak me’mûrlar ma‘rifetleriyle civâr-ı saltanat-ı seniyyede îcâbına göre geşt ü güzâr ve iktizâsına göre lâzım gelen mahalleri muhâfaza etmek üzere me’mûriyetleri husûsuna irâde-i aliyye ta‘alluk etmiş olmağla ma‘rifetiniz ile işbu irâde-i aliyyeyi mahallât imâmlarını ve kâffe-i esnâf kethüdâlarını celb ve ifâde ederek bâlâda beyân olunduğu üzere gerek mahallât ahâlîsinden ve gerek bi’l-cümle esnâf gürûhundan lâ-ekal dört-beş bin mikdârı asâkirin serasker-i müşârun-ileyh ma‘rifetiyle ta‘yîn olunacak me’mûrlar ma‘iyetiyle Davudpaşa sahrâsında hâzır ve âmâde bulunmalarını iktizâ edenlere tenbîh ve icrâ eyleyesin deyü Fî 22 S sene 1245