Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 402 Hüküm no: 470 Orijinal metin no: [75b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in Mehmed Çelebi b. Mustafa Çelebi ve ortağına olan borcunu ödemesi Kasab tâifesinden bâ‘isü hâze’l-kitâb Mehmed Çelebi b. Mustafa Çelebi ve şerîki Ahmed Beşe b. Abdullah nâm kimesneler meclis-i şer‘-i şerîf-i enverde mahmiye-i İstanbul’da Balaban Ağa mahallesinde sâkin Mehmed b. Ahmed nâm kimesne mahzarında her biri üzerine da‘vâ ve takrîr-i kelâm edip mezbûr Mehmed zimmetinde yedimizden müşterâ ve makbûz vakıyye ve kıymeti beynimizde ma‘lûm lahm-ı ganem bahâsından on bin beş yüz akçe hakkım olup meblağ-ı mezbûrun bin altı yüz akçesini yedinden ahz u kabz edip sekiz bin dokuz yüz akçe zimmetinde bâkī kalmağla hâlâ suâl olunup meblağ-ı bâkī-i mezbûru dahi bize edâ [ve] teslîme tenbîh olunmak matlûbumuzdur dediklerinde gıbbe’s-suâl mezbûr Mehmed cevâbında fi’l-hakīka müdde‘iyân-ı mezbûrân ber vech-i muharrer ol cihet-i mezbûreden bâkī sekiz bin dokuz yüz akçe elân zimmetinde lâzımü’l-edâ deynimdir deyû bi tav‘ihî ikrâr ve i‘tirâf etmeğin alâ mûcebi i‘tirâfihî meblağ-ı bâkī-i mezbûru dahi mezbûrâna edâ ve teslîme mezbûr Mehmed’e tenbîh olunup mâ vaka‘a bi’t-taleb ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. Abdi, İsmail Çelebi b. Mehmed, Mehmed b. İdris, Mahmud b. Ömer [ve] gayruhüm.