İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 404 Hüküm no: 225 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gayr-ı müslimlerden doğan, ölen ve şehre gelip gidenlerin kayıt altına alınması Rum ve Ermeni ve Yahûd tâifesinin tevellüd ve hâlik olanlarını ihbâra dâir emr-i âlî İstanbul kādısı fazîletli efendi Bundan akdem kerâmet-efzâ-yı sahîfe-i sünûh ve sudûr buyrulan hatt-ı hümâyûn-ı şevket-makrûn-ı hazret-i şâhâne mûcibince Dersa‘âdet ve bilâd-ı selâsede mutavattın kâffe-i İslâm mahalle be-mahalle tahrîr ve sebt-i defter olunmuş ve mu’ahharan dahi dahl ve harc ve fevt ve tevellüdleri nizâmât-ı müstahseneye rabt ve tevsîk ile ilâ-mâşâallâhu te‘âlâ düstûrü’l-amel tutulması îcâb edenlere başka başka fermânlar ısdârıyla tenbîh ve tekîd kılınmış olduğundan muktezâsının icrâsına dikkat ve ihtimâm olunacağı derkâr ise de usûl-i mezkûrenin milel-i selâse haklarında dahi icrâsı tensîb ve istihsân ve iktizâsına göre Bâbıâlî’den me’mûr ta‘yîniyle sûret-i irâde-i seniyye îcâb edenlere başka başka buyruldular ısdârıyla tenbîh ve fermân olunmuş olmağla siz dahi bu bâbda tarafınızdan me’mûr ta‘yîniyle ma‘rifet-i şer‘le ve Rum ve Ermeni patrikleri ve hahambaşı taraflarından ta‘yîn olunacak papazlar ve hahamlar ma‘rifetleriyle Dersa‘âdet’de olan mahallerde mütemekkin bi’l-cümle Rum ve Ermeni ve Yahûd tâifesi milletçe umûmen tahrîr ve sebt-i defter olunarak ehl-i İslâm hakkında olduğu misillü ba‘d-ez-în bunların dahi içlerinde mürd ve hâlik olanları ve kız ve erkek olarak tevellüd eden çocukları papas ve hahamlar ma‘rifetleriyle yevmiye İstanbul Mahkemesi tarafına ilmuhaber verilerek mazbût olacak defterleri ol vechile terkīn ve tashîh olunması ve taşaradan maslahatlı maslahatsız gelenleri dahi ehl-i İslâm usûlüne konulması vesâilinin istihsâline mübâderet ve işbu nizâmât-ı hasenenin hilâfına hareket eden olur ise hakkında derhâl tedîbât-ı lâzime icrâ kılınacağını iktizâ edenlere tenbîh ve tefhîme mübâderet ve siz dahi ale’d-devâm bu husûsa ihtimâm ve dikkat eyleyesin deyü Fî-gurre-i Ca sene 1245