İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 409 Hüküm no: 229 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan ayında fırınlarda iyi cins ekmek pişirilmesi Ramazan-ı şerîfde nân-ı azîz-i hâs tabh olunmasına dâir İstanbul kādısı fazîletli efendi Mecma‘-ı feyz ve bereket olan Âsitâne-i şevket-âşiyâne-i şâhânede mustazıll-ı sâye-i merhamet-i seniyye olan ibâdullâhın eyyâm-ı mübârekede tena‘um ile meşgūl-i du‘â-yı hazret-i şehriyârî olacakları nân-ı azîzin numûnesini zahîre nâzırı ağaya tenbîh ve sipâriş olunduğuna binâen nâzır-ı mûmâ-ileyhin takdîm eylediği pusula mantûkunca ecnâs-ı hıntadan tertîb ve tabh ettirmiş olduğu numûne Bâbıâlî’ye celb olunarak huzûr-ı lâmi‘u’n-nûr-ı cenâb-ı pâdişâhîye arz ile meşmûl-i lahza-i ma‘âlî ifâza-i cenâb-ı şehinşâhî-i mezkûr dahi pesendîde-i hümâyûn-ı cihânbânî buyrularak bi-mennihî te‘âlâ ibtidâ-yı bed’inden intihâsına değin bu vechile bilâ-tağyîr tabh olunması me’mûrlara müekked tenbîh olunup bu tenbîhâtın üzerine yine hilâfı harekette bulunur olur ise derhâl iktizâ eden tedîbi icrâ kılınması husûsuna irâde-i aliyye-i şâhâne ta‘allukuyla ol bâbda hatt-ı hümâyûn-ı inâyet-makrûn-ı tâc-dârî şerefrîz-i sahîfe-i sudûr buyrulmuş ve ber-mantûk-ı irâde-i aliyye bi-mennihî te‘âlâ hîn-i mebde’inden hitâmına kadar zerre kadar kesb-i tenezzül etmemesi ve eğer tabh ve numûnesinde tenezzül müşâhede olunur ise tedîb olunacakları tenbîh ve tekîd-birle ale’d-devâm icrâsına ihtimâm-ı tâm ve ol vechile ibâdullâhdan taraf-ı eşref-i mülûkâne için isticlâb-ı da‘avât-ı hayriyeye ikdâm etmeleri iktizâ edenlere bâ-buyruldu beyân ve ifâde olunmuş olmağla siz dahi bu husûsa kemâliyle i‘tinâ ve dikkat ve hilâf-ı tenbîh harekete mütecâsir olur bulunur ise tedîbât-ı şedîdesi icrâ olunmak üzere derhâl ifâdeye müsâra‘at-birle bu husûsa dâimâ ihtimâm ve nezâret eyleyesin deyü Fî 24 Ş sene 1245