Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 402 Hüküm no: 471 Orijinal metin no: [76a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Ahmed’in çocukları ve câriyesi için kocası Abdülvehhâb b. Salih üzerine nafaka takdir edilmesi Mahmiye-i İstanbul’da Ma‘cûncu Kasım mahallesinde sâkine olup zâtını ma‘rifet-i şer‘iyye ile ârifân İbrahim Çorbacı b. Ömer ve Yusuf Efendi b. Mustafa ta‘rîfleriyle mu‘arrefe olan Sâliha bt. Ahmed Çorbacı nâm hâtun şer‘-i şerîf-i enverde takrîr-i kelâm ve ta‘bîr ani’l-merâm edip gāib ani’l-meclis Abdülvehhab b. Sâlih nâm kimesne zevcim olup bundan akdem benimle mezbûrlar firâşından hâsıla işbu sadriye sagīre kızım Fâtıma ve kendi mülkü olan Servinaz bt. Abdullah nâm câriyesini bilâ-nafaka terk edip âhar diyâ[ra] gitmekle benim ve sagīre-i mezbûre Fâtıma ve Servinaz’ın nafaka ve kisve ve sâir levâzım-ı zarûriyyemiz için kıbel-i şer‘den zevcim gāib Abdülvehhâb üzerine kadr-i ma‘rûf nafaka farz ve takdîr olunmak matlûbumdur dedikde hâkim-i muvakki‘-i sadr-ı kitâb -tûba-lehü ve hüsnü me’âb- hazretleri dahi ba‘de’t-tahlîfi’ş-şer‘î ber vech-i muharrer mezbûr Sâliha Hâtun için yevmî on dört akçe ve sagīre-i mezbûre Fâtıma için yevmî sekiz akçe ve mezbûre Servinaz için kezâlik sekizer akçe ki min haysi’l-mecmû‘ gāib-i mezbûr Abdülvehhâb üzerine târih-i kitâbdan beher yevm otuzar akçe nafaka farz ve takdîr edip meblağ-ı mefrûz-ı mezbûru kendi ile sagīre-i mezbûreye [ve] Servinaz[‘a] harc ve sarfa ve lede’z-zarûre istidâneye ve inde’z-zafer zevci gāib-i mezbûr Abdülvehhab üzerine rücû‘a mezbûre Sâliha Hâtun’a izin vermeğin mâ vaka‘a bi’t-taleb ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çorbacı b. Ömer, Yusuf Efendi b. Mustafa, Musa b. Abdullah, Hüseyin Beşe b. Ahmed.