İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 414 Hüküm no: 234 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhallefatlardan çıkan altın ve gümüşün satılmaması ve görevliler tarafından kayıt altına alınarak Darbhâne-i Âmire’ye teslim edilmesi Muhallefâtlarda zuhûr eden sim ve zeri doğru Darbhâne’ye irsâl olunmasına dâir ilmuhaber Cânib-i mîrîden zabt ve Âsitâne-i aliyye ve bilâd-ı selâsede zuhûr ile fürûht olunan muhallefâtlarda bey‘ olunan evânî-i sim ve zeri alan kimesneler ekserîsi hey’etiyle fürûht etmeyip tama‘-ı hâma teba‘iyet ile hafîce kāl ve izâbe ettirerek kuyumcu esnâfına ve sâir memnû‘ olan mahallere fürûht etmekde olduklarından ve bu husûs mübâya‘ât maddesinin durgunluğunu? mûcib olacağından ba‘d-ez-în cânib-i mîrîden zabt ve Âsitâne-i aliyye ve bilâd-ı selâsede zuhûr ile fürûht olunan muhallefâtlarda çıkan bi’l-cümle evânî-i sim ve zer o makūle muhtekir yedlerine geçmemek için fürûht olunmayarak Darbhâne-i Âmire’ye irsâl ve kefce-i hümâyûna teslîm ve bi’l-vezn her ne mikdâr sim ve zer-i hâlis zuhûr eder ise îcâb eden bahâsı Darbhâne-i Âmire’den i‘tâ olunmak üzere ve hilâfına ictisâr ederi olur ise tedîbleri icrâ kılınmak bâbında askerî kassâmı efendilere ve sâire hitâben beyâz üzerine fermân ısdârıyla cümleye i‘lân olunmuş ise de el-hâletü hâzihî ba‘zı mürtekib ve tama‘kâr makūleleri muhallefâtlarda zuhûr eden evânî-i sim ve zeri alıp Darbhâne-i Âmire’ye götürmeyip hufyeten memnû‘ olan mahallere fürûhta ictisâr eyledikleri bu def‘a sahîhan tahkīk ve istihbâr olunmuş olup ancak bu keyfiyet bi’l-vücûh rızâ-i şerîfin mugāyiri ve Darbhâne-i Âmire’nin umûr-ı mu‘tenâsından olan mübâya‘ât nizâmında inhilâl ve ihtilâlini mûcib olacağı âşikâr olmağla bu sûretde mübâya‘ât nizâmını ihtilâlden vikāye fîmâ-ba‘d gerek cânib-i mîrî ve gerek Âsitâne ve bilâd-ı selâsede vukū‘ bulan beyne’n-nâs fürûht olunan muhallefât ve metrûkâtlarda zuhûr eden evânî-i sim ve zeri muhtekir yedlerine geçmemek için fürûht olunmayarak muhallefât me’mûrları ma‘rifetiyle doğru Darbhâne-i Âmire’ye irsâl ve kefce-i hümâyûna teslîm ve bi’l-vezn her ne mikdâr sim ve zer-i hâlis zuhûr eder ise fiyat-ı râyicesiyle îcâb eden bahâsı Darbhâne-i Âmire tarafından i‘tâ olunmak üzere bilâd-ı selâse muhallefâta kaydolunup husûs-ı mezbûrun ol vechile tenfîz [80b] ve icrâsına sa‘y ve gayret olunmak için bilâd-ı selâse kādıları ve kassâm efendiler taraflarına başka başka ve bedestânda fürûht olunan evânî-i sim ve telli ve tırtıllı ve pullu ve buna mümâsil köhne ve atîk eşyâ hîn-i bey‘inde her kim olur ise olsun bedestân kethüdâları ma‘rifetiyle deftere kayd ettirdip yakmağa? elverir şeyleri Darbhâne-i Âmire’ye ve hey’etiyle fürûht murâd edenleri olur ise füruhtda her kim satar ise ismiyle esâmîsi bâlâlarına şerh verilerek ve hilâfı hareket vukū‘a gelir ise cesâret eden her kim olur ise olsun tedîbât-ı lâyıkaları icrâ kılınacağı beyânıyla kethüdâ-yı mûmâ-ileyhimâya başka ve keyfiyet ma‘lûm olmak için Darbhâne-i Âmire’ye başka ilmuhaberleri i‘tâsıyla tesviyesi husûsunu Darbhâne-i Âmire nâzırı sa‘âdetlü atûfetlü efendi hazretleri memhûr takrîriyle inhâ etmekle iktizâsı icrâ olunmak bâbında sâdır olan fermân-ı âlî mûcibince ilmuhaberi verilmek fermân buyrulmağın mûcibince muhallefâta kaydolunup lâzım gelen mahallere ilmuhaberleri verilmekle keyfiyet-i irâde-i seniyye ma‘lûm ve îcâbı icrâsına himmet olunması için İstanbul kādısı fazîletli semâhatlü efendi hazretleri taraflarına işbu ilmuhaber kāimesi verildi. Fî 15 L sene 1245