İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 415 Hüküm no: 235 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadınların gereksiz yere ve uygunsuz kıyafetlerle sokağa çıkmaması İstanbul kādısı fazîletli efendi Cemî‘ zamânda nisvân tâifesinin edebiyâne ve mestûrâne hareketle gezmeleri lâzime-i hâllerinden ve bu husûsa ötedenberü i‘tinâ olunarak me’mûrlara tenbîh olunmakda idüğü ma‘lûm olan mevâddan iken bu esnâda tâife-i nisvân hadd-i edebden hâric kıyâfet ve uygunsuz etvâr ile bilâ-mûcib sokağa çıkıp işbu eyyâm-ı mübârekede dahi mücerred seyr u temâşâ garazıyla memer ve ma‘ber olan mahallerde ve ale’l-husûs Sultan Ahmed ve Sultan Bayezid ve sâir selâtîn-i izâm cevâmi‘-i şerîfeleri havlularında ve esvâk ve pazarda bî-hayâ gezinmek ve işbu leyâlî-i mübârekede dahi cevâmi‘-i şerîfede salât-ı terâvîhi cemâ‘atle edâ ser-riştesiyle geceleri sokaklarda geşt ü güzâr etmekde ve yine dükkânlar pîşgâhında eğlenmekde olduklarından mâ‘adâ ötedenberü mer‘î olup kadın yaşmağı ta‘bîr olunan hey’etin terkiyle bilâ-içlik yalnız yaşmak puşîdesiyle mugāyir-i şer‘-i şerîf mekşûfâne kıyâfet ve be-gāyet uygunsuz tavır ile gezmekde oldukları meşhûd olarak bu evzâ‘-ı kerîhenin men‘i ve fîmâ-ba‘d gecelerde nisvânın sokaklarda ve Sultan Ahmed meydanında gezmemeleri irâde olunmuş olmağla imdi eimme-i mahallâtı nezdinize celb ile fîmâ-ba‘d tâife-i nisvân gündüzleri umûr ve mesâlih-i dâfi‘alarının [vâkı‘alarının] rü’yeti zımnında sokağa çıkmaları îcâb eylediği hâlde kadın yaşmağı ta‘bîr olunan kıyâfet ya‘ni altına içlik ve üstüne sıkça yaşmak puşîdesi ve edebiyâne tavırlarıyla çıkıp maslahatlarını görmek ve seyr u temâşâ garazıyla maslahatsız gündüzleri öyle edebsiz kıyâfetle kalabalıklı mahallerde toplanıp gezmeyip ve yemeniciler ve sâir dükkânlar önlerinde oturmayıp ayakdan alacakları şeyi almak ve zinhâr ve zinhâr geceleri hiç sokağa çıkmamak üzere sûret-i irâdeyi ahâlî-i mahallâta güzelce i‘lân ve ifhâm eylemeleri râbıtasının istihsâline dikkat eyleyesin deyü Fî 8 N sene [1]245