İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 433 Hüküm no: 240 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balıkçı dükkanlarında tekelleşmenin önlenmesi Ortaköy mütemekkinlerinden balıkçı esnâfının ez-kadîm mutasarrıf oldukları dükkân ile gediklerinden mâ‘adâ Galata muzâfâtından Beşiktaş kasabasına tâbi‘ Ortaköy’de balıkçı dükkânı ve gediği yoğiken kuyumcu esnâfından Bogos nâm zimmî Tophane’de mutasarrıf olduğu bir bâb balıkçı dükkânı gediğini mukaddemâ karye-i mezbûra nakli için mesfûr Bogos bir-takrîb emr-i şerîf ısdâr ettirmiş ise de kadîmden beri karye-i mezbûrede bundan gayrı balıkçı dükkânı olduğundan ve müceddeden gedik nakli ve dükkân küşâdı memnû‘iyetden olduğundan gayrı küşâdında esnâf ve ahâlî-i karyeye mazarrat ve hasâreti mûcib olduğunu ahâlî ve esnâf-ı mezkûre ifâde eylediklerini bostancıbaşı esbak i‘lâm etmiş ve men‘i hâvî ol vakitde fermân-ı âlî sâdır olmuş iken mesfûrîne küşâd ve ahâlî-i karyeyi ızrâr kasdında olduğu beyân-birle emr-i mezkûrun kaydı terkīn olunarak fîmâ-bâ‘d [85b] dükkân-ı mezkûr küşâd olunmamak bâbında emr-i şerîf sudûrunu esnâf-ı merkūm mukaddemâ bâ-arzuhâl istid‘â eylediklerinden Tophane’den Ortaköy’e balıkçı dükkânı naklini hâvî eğerçi emr-i şerîf verilmiş olup ancak dükkân-ı mezkûrun nakli esnâf ve ahâlî-i karyeye mazarrat ve hasâreti mûcib olduğunu ahâlî ve esnâfın ifâdelerine mebnî bostancıbaşı mûmâ-ileyhin i‘lâmı mûcibince verilen emr-i merkūmun kaydı terkīn olunarak men‘i bâbında Galata kādısına hitâben iki yüz on altı senesi Muharremi’l-harâmı evâsıtı târîhinde bâlâsı hatt-ı hümâyûn ile muveşşah sâdır olan emr-i âlîyi karye-i mezbûrda mütemekkin balıkçı Yahûd tâifesi ser-rişte ile balık bey‘ ve şirâsını kendülere hasr ederek dükkânlarının ziyâde olmamasını tâife-i mersûme bu def‘a bâ-arzuhâl istid‘â edip bu makūle inhisâr-ı bey‘ ve şirâ maddesi ötedenberü memnû‘ olduğuna mebnî fîmâ-ba‘d işbu inhisâr husûsu fesh olunarak mersûmların ber-vech-i muharrer mukaddemâ ısdâr ettirip kaleminde mukayyed olan emr-i şerîf-i mezkûrun kaydı terkīn olunması husûsuna irâde-i kerâmet-ifâde-i hazret-i cihândârî ta‘allukuyla ol bâbda şeref-efzâ-yı sünûh ve sudûr buyrulan emr-i hümâyûn-ı mehâbet-makrûn-ı şâhâne mantûk-ı münîfi üzere emr-i şerîf-i mezkûrun kaydı ref‘ ve terkīn ve İstanbul Bâb Mahkemesi’ne ilmuhaberi i‘tâ olunmak bâbında fî-24 L sene 1245 târîhinde beyâz üzerine sâdır olan fermân-ı âlî mûcibince emr-i mezkûrun kaydı ref‘ ve terkīn ve yedlerinde bulunan emr-i âlî ile iki yüz yirmi beş târîhinde murâfa‘alarını nâtık i‘lâm-ı şer‘î yedlerinden nez‘ ve battâlda hıfz olunmuş olmağla keyfiyet ma‘lûm olmak için Dîvân-ı Hümâyûn Kalemi tarafından İstanbul Bâb Mahkemesi’ne işbu ilmuhaber verildi. Fî 5 Z sene 1245