İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 435 Hüküm no: 242 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzu ve süt fiyatlarına narh konulması Kuzu narhı İstanbul kādısı fazîletli efendi Çekmece-i Kebîr ve Sağīr civârında kâin çiftlikât ve mandıra ashâbının takdîm eyledikleri bir kıt‘a arzuhâllerinde rûz-ı hızırın takarrubu cihetiyle kuzu ve südün vakte tatbîkan fiyatının kat‘ı istid‘â olunmuş olduğundan keyfiyet tarafınıza lede’l-havâle ihtisâb nâzırı ve kasabbaşı efendiler ile kasablar kethüdâsı ve ustaları ve südçü esnâfı ve sâir iktizâ edenler celb ile ashâb-ı ağnâm kuzularını muhtekir tâifesine ve sâire vermemek şartıyla kuzunun beher kıyyesini altmış altışar paraya almağla ve ibâdullâha yetmiş ikişer paraya vermeğe tarafeyni ta‘ahhüd etmiş ve südün dahi baş pazarının beher kıyyesi yirmi iki ve orta pazarı yirmi bir buçuk ve aşağı pazarı yirmi bir paraya vermek üzere südçü esnâfı dahi râzı olmuş oldukları tarafınızdan bâ-i‘lâm inhâ olunmuş ve ibâdullâhın sâye-i merhamet-vâye-i şâhânede zarûret çekmemeleri matlûb-ı âlî olduğundan beher sene olageldiği vechile kuzulu bahâr ağnâmını muhtekir ve mardabâzân makūlelerine bey‘ etmeyip Silivri’de kat‘ olunacak baş pazarına kıyâsen mandıra ve ağıllar ve çiftlikât ashâbına vermeleri zımnında iktizâ edenlere mektûblar tahrîr ve Baruthâne-i âmireler nâzırı efendiye dahi buyruldu tasdîr kılınmış olmağla siz dahi gerek kasab ve gerek südçü esnâfının ta‘ahhüdleri vechile ba‘de’l-ezîn kuzunun fiyatı lahm-ı ganemden ayrılmayıp ikisi de bir fiyat ile satılmak üzere kuzu ve südün fiyat-ı mezkûre ile ibâdullâha fürûhtuyla ziyâdeye alınıp verilmemesini ve bi-mennihî te‘âlâ rûz-ı hızırda külliyetli kuzu zebh olunmasını esnâf-ı merkūmeye tenbîhe dikkat ve siz dahi bu maddelere ale’d-devâm nezâret eyleyesiz. Fî 12 L sene [12]45 Devletlü es-Seyyid el-Hâc Abdürrahim Efendi’nin zamânlarında vukū‘-yâfte olan fermân-ı âlî sicilidir. Fî-gurre-i Muharrem sene 1246