İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 437 Hüküm no: 244 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tatavla’da ekmek fırını açılmasına izin verildiği Tatavla’da ekmekçi fırını inşâsına dâir ilmuhaber Tatavla karyesi ahâlîsinden Bâbıâlî’ye takdîm eyledikleri işbu arzuhâlleri meâlinden karye-i mezbûrede ekmekçi fırını olmadığından akvât-ı yevmiyelerine muktezî olan nân-ı azîzi Galata ve Kasımpaşa ve Tophane’den mübâya‘a etmekde iseler de karye-i mezbûr beş yüz hâneden mütecâviz olduğuna ve yağmur ve kışda nân-ı azîz ahz u celbinde zahmet çekmekde olduklarına mebnî karye-i mezbûrede bir aded habbâz fırını inşâsına müsâ‘ade buyrulması husûsunu tahrîr ve istirhâm etmeleriyle karye-i mezbûrede koltuk ta‘bîr olunur kadîmden bir bâb habbâz fırını olduğu kapan sicilinde mukayyed ise de mu’ahharan muhterik olarak arsasına binâ inşâ kılınmış olduğu erbâb-ı vukūfdan tahkīk olmuş olmağla bu sûretde el-yevm karye-i mezbûrede ekmekçi fırını olmadığından istirhâmları ve kadîmi vechile bir aded koltuk fırını inşâsına ruhsat buyrulduğu takdîrce beher yevm iktizâ edecek dakīki Galata ve Kasımpaşa’da kâin uncu değirmenlerinden tertîb ve i‘tâ olunarak fırın-ı mezbûr da sâir habbâz fırınları misillü bayağı çarşı ekmeği tabh ve ibâdullâha bey‘ ve fürûht olunmak üzere kalemine kayd ile ruhsatı hâvî sûreti ve kapan sicillâtına ve sâir iktizâ eden mahallere ilmuhaberleri i‘tâsıyla tanzîmi husûsunu hâlâ zahîre nâzırı dergâh-ı âlî kapıcıbaşılarından el-Hâc Veli Ağa memhûren i‘lâm etmekle mûcibince kalemine kayd ile sûret ve ilmuhaberleri i‘tâsıyla tanzîmine mübâderet olunmak bâbında sâdır olan fermân-ı âlî mûcibince kaydolunup fırın-ı mezbûrun inşâsına ruhsatı hâvî sûreti ve iktizâ eden mahallere başka başka ilmuhaberleri verilmekle keyfiyet ma‘lûm olmak üzere fazîletli İstanbul kādısı efendi hazretleri taraflarına işbu ilmuhaber verildi. Fî 13 L sene 1245 Der-zamân-ı Mehmed Nazif Beyi