İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 438 Hüküm no: 245 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Usta ve işçilerin yevmiye ücretleri Bâ-sahh-ı âlî Ücret-i amele fiyatı emri İstanbul kādısı fazîletli efendi Ebniye maddesi ibâdullâhın mesâlih-i zarûriyesinden ma‘dûd olarak ez-her sûret teshîlâtı esbâbının istihsâl lâzimeden olmak ve ebniye husûsunda istihdâm olunan neccâr ve amele ve duvarcı ve silici ve sıvacı ve nakkāş makūleleri vesâil-i nâ-münâsibe ile ziyâde yevmiye almaklığı i‘tibâr ve gün be-gün terakkīsini mu‘tâd etmiş bulunmak hasebiyle bu madde bir zâbıta ve râdde tahtına konmadıkça gittikçe tezâyüd bularak ızrâr-ı ibâdı müstelzim olacağından husûs-ı mezbûrun tarafeyne gadr olmayacak sûretle hüsn-i tesviyesi îcâb-ı hâlden olmakdan nâşî ebniyede istihdâm olunagelen her bir sınıfın hâl ve san‘atlarına göre ücret-i yevmiyeleri takdîr ve bir pusulaya tahrîr olunarak bundan böyle ebniye ashâbı esnâf-ı merkūmeye ol vechile yevmiye i‘tâsıyla istihdâm etmek ve ziyâde ücret ister olur ise bi’t-tahkīk tedîb olunmak üzere tenbîhât-ı lâzime bu def‘a iktizâ edenlere buyruldular tahrîriyle bildirilmiş ve pusula-yı merkūmenin bir sûreti dahi tarafınıza gönderilmiş olmağla îcâb ve iktizâ edenleri nezdinize celb ile esnâf-ı merkūmeden ba‘d-ez-în zikr olunan pusulada muharrer yevmiyeden ziyâde akçe alır olur ise o makūleler bi’t-tahkīk eşedd-i tedîbâta mazhar olacağını ve hiçbir kimesne kat‘ olunan fiyatdan ziyâde şey vermeyip ale’d-devâm bu usûl icrâ kılınacağını etrâfıyla gûş-i intibâhlarına ilkāya mübâderet ve siz dahi işbu nizâmın devâm ve istikrârına kemâliyle dikkat ve nezâret eyleyesin deyü Fî 5 M sene 1246 Neccâr kârhânecisi Para: 280 A‘lâ neccâr Para: 200 Vasat neccâr Para: 180 Ednâ neccâr Para: 160 Silicibaşı Para: 280 A‘lâ silici Para: 200 Vasat silici Para: 180 Ednâ silici Para: 160 Duvarcıbaşı Para: 260 A‘lâ duvarcı Para: 190 Vasat duvarcı Para: 180 Ednâ duvarcı Para: 160 Hammâmcıbaşı Para: 280 A‘lâ hammâmcı Para: 190 Vasat hammâmcı Para: 180 Ednâ hammâmcı Para: 160 Taşçıbaşı Para: 280 A‘lâ taşçı Para: 190 Vasat taşçı Para: 180 Ednâ taşçı Para: 160 Lağımcıbaşı Para: 200 Lağımcı neferi Para: 140 Irgādbaşı Para: 180 Hammal neferi Para: 140 Haraccı rencber Para: 130 Ednâ rencber Para: 120 Tekneci Para: 90 Bıçakçıbaşı Para: 200 Bıçakçı neferi Para: 140 Sıvacıbaşı Para: 280 A‘lâ kalemkâr Para: 240 A‘lâ sâdekâr Para: 220 Vasat sıvacı Para: 200 Ednâ sıvacı Para: 160 Nakkāşbaşı Para: 280 Kalemkâr nakkāş Para: 240 Sâdekâr nakkāş Para: 220 Vasat nakkāş Para: 200