İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 443 Hüküm no: 248 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’dan avarız vergisi toplanması Avârız emri Akzâ kuzâti’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în mevlânâ İstanbul kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Hazîne-i âmirem defterleri mûcibince İstanbul kazâsı iki bin altı yüz doksan beş buçuk ve bir sülüs avârızhânesi olup bin iki yüz kırk altı senesine mahsûb olmak üzere cem‘ ve tahsîli lâzım gelmeğin der-uhde olunup yedine mühürlü nişanlı mevkūfât defteri sûreti verilmekle imdi mûcibince cem‘ ve tahsîl ettirilmek fermânım olmuşdur. Buyurdum ki hükm-i şerîfimle mübâşir vardıkda bu bâbda sâdır olan emrim üzere amel edip dahi sene-i merkūmeye mahsûben kazâ-i mezbûrun ol mikdâr avârızhânesi olup Tersâne-i Âmire’m ocaklığı olan beher hânesinden dörder yüz yirmi dokuzar akçe kürekçi bedelleri irsâl olunan mühürlü nişanlı mevkūfât defteri sûreti mûcibince vakt ü zamânıyla yerli yerinden cem‘ ve tahsîl ve dâhil-i Tersâne-i Âmire’m ettirdip hilâf-ı emr ve defter kimesneye inâd ve muhâlefet ettirmeyesin ve bundan mâ‘adâ mübâşir-i merkūmun cihet-i ma‘âşı için her bir avârızhânesinden otuzar akçe ve on beşer akçe harc Tersâne-i Âmire’m için aldırıp ve avârızı için alınan akçenin her yüz on akçesinden bir esedî guruş tahsîl olunup ve hîn-i tahsîlde mîrî için alınan akçeyi Hazîne-i Âmire’me alındığı vech üzere aldırdıp bundan ziyâde ve noksan alınmaya ve aldırmayasın, kesr-i defterden ve naks-ı hâneden ve fermân âlîşânımdan ziyâde mutâlebesiyle zulüm ve te‘addî olunmakdan tehâşî ve mücânebet eyleyesin, şöyle bilesin, alâmet-i şerîfe i‘timâd kılasın. Fî 7 M sene [1]246