İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 447 Hüküm no: 252 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferhad Ağa Mahallesi’nde İsmail Efendi Vakfı’na ait yıkılmış mektep arsasının Kazasker Mehmed Efendi Mahallesi’nde bulunan yeni mekteple değiştirilmesi İstibdâl emri Akzâ kuzâti’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în bi’l-fî‘l İstanbul kādısı mevlânâ Abdurrahim -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki el-Hâc Mahmud nâm kimesne südde-i sa‘âdetime arzuhâl edip zikri âtî husûsun mahallinde lede’l-mu‘âyene keşf ve tahkīki için savb-ı şer‘-i enverden irsâl olunan başkâtib eşrâf-ı kuzâtdan mevlânâ İbrahim Ârif -zîde ilmuhû- ve hâssa mi‘mâr hulefâsından Mehmed Said ve Mehmed Râşid halîfeler ile nezâretlerinde olan evkāfdan İstanbul’da Çinilihamam kurbünde Ferhadağa Mahallesi’nde vâki‘ etrâf-ı selâsesi hâcegân-ı Dîvân-ı Hümâyûn’umdan hâlâ hâssam kasabbaşısı Mehmed Şâkir -zîde mecdühû- ile halîlesi Âişe -zîdet iffetühâ- konağı ve taraf-ı râfi‘i tarîk-i hâs ile mahdûd ashâb-ı hayrâtdan reisü’l-küttâb esbak İsmail Efendi’nin hayâtında binâ ve ihyâsına muvaffak olup mürûr-ı ezmine ile münhedim olan mektebe varıp civârında Hüsameddin Mahallesi ahâlîsinden Attâr Hocazâde Mehmed Eşref b. es-Seyyid Abbas ve Penbecizâde Hasan b. el-Hâc Mehmed ve Cebehâneci Hasan b. Mehmed ve Mestçi İbrahim b. el-Hâc İsa ve Kahveci Mehmed b. Hasan ve sâir mazbûtü’l-esâmî Müslimîn huzûrlarında ba‘de-akdi’l-meclis vakf-ı mezbûr mütevellîsi merkūm el-Hâc Mahmud b. Abdulkādir meclis-i ma‘kūd-i mezkûrda es-Seyyid Mehmed Saadeddin b. Mehmed Tahir mahzarında mütevellîsi olduğu merhûm İsmail Efendi Vakfı’ndan olan mekteb-i mezbûr mürûr-ı ezmine ile münhedim olup vakfında tecdîde müsâ‘ade-i galle olmadığından mâ‘adâ civârında çend aded mekâtib el-ân mevcûd olmağla ben dahi mekteb-i mezkûr enkāzını semen-i misli idüğü mi‘mârân ve Müslimûn-ı merkūmûn haberleriyle zâhir olan iki yüz on guruşa kıbel-i şer‘den me’zûn olarak bi’t-tevliye mûmâ-ileyh es-Seyyid Mehmed Saadeddin’e bey‘ ve teslîm ve semen-i mezkûr iki yüz on guruşu mûmâ-ileyh es-Seyyid Mehmed Saadeddin’in yedinde zikri âtî istibdâl olunacak cedîd mektebin ba‘de’l-istibdâl hâric havlu duvarlarına sarf için ibkā edip üzerine kendi mülkü olmak üzere binâ inşâsına izin verdiğime mebnî üzerine müceddeden menzil binâ ve inşâ etmekle ol vechile arsa-yı sırfası mûmâ-ileyh es-Seyyid Mehmed Saadeddin’in bâ-hüccet yedinde mülkü olup bu esnâda müceddeden binâ ve inşâ eylediği İstanbul’da Hüsrev Paşa kurbünde Kazasker Mehmed Efendi Mahallesi’nde vâki‘ bir tarafından Sandıkçı el-Hâc Hasan menzili ve tarafeyni mûmâ-ileyh es-Seyyid Mehmed Saadeddin’in bahçesi ve taraf-ı râbi‘i tarîk-i âm ile mahdûd bir bâb mülk mekteb ile istibdâl murâd olunmağla vakıf olan arsa-yı sırfa-i merkūme mülk olan cedîd mekteb-i merkūm keşf ve mesâha ve tahmîn olunup istibdâli cânib-i vakfa enfa‘ ise i‘lâm olunmak bi’t-tevliye matlûbumdur dedikde evvelâ arsa-yı sırfa-i mevkūfe mi‘mârân-ı mezbûrân ma‘rifetleriyle mesâha ve tahmîn olundukda terbî‘an doksan beş zirâ‘ altı parmak olup beher zirâ‘ı üçer guruşdan iki yüz seksen beş guruş otuz para olduğunu Müslimûn-ı merkūmûn ba‘de’l-ihbâr sâniyen mârru’z-zikr Kazasker Mehmed Efendi Mahallesi’nde vâki‘ mûmâ-ileyh es-Seyyid Mehmed Saadeddin’in mülkü olan mekteb-i cedîd-i mahdûd-ı mezkûr üzerine varılıp mütevelli-i merkūm el-Hâc Mahmud’un sulbî kebîr oğlu ve tarafından husûs-ı âtîde vekîl-i sâbitü’l-vekâlesi Mehmed İzzet ile mûmâ-ileyh es-Seyyid Mehmed Saadeddin her biri hâzır oldukları hâlde mahalle-i mezbûre ahâlîsinden muhtâr-ı evvel Attâr el-Hâc Ahmed b. Mehmed ve mektûbî-i defterî kalemi hulefâlarından es-Seyyid Mehmed Azîz Bey b. es-Seyyid Mehmed Said Bey ve Bekçi es-Seyyid Mehmed Emîn b. Halil ve Ali b. İbrahim ve sâir mazbûtü’l-esâmî kimesneler huzûrlarında mesâha ve tahmîn ve takvîm olundukda arsa-yı memlûkesi terbî‘an yüz altmış sekiz zirâ‘ olup beher zirâ‘ı dörder guruşdan altı yüz yetmiş iki guruş [90b] ve mekteb-i mezkûrun cedîd ebniyesi ma‘a-saçak terbî‘an seksen üç zirâ‘ iki parmak olup beher zirâ‘ elli beşer guruşdan dört bin beş yüz altmış dokuz guruş yirmi üç para ve sokak kapısının derûn ve bîrûnunda olan saçak terbî‘an on iki zirâ‘ üç parmak olup beher zirâ‘ı on beşer guruşdan seksen bir guruş otuz beş para olup ol vechile arsa ve ebniye-i memlûke-i mezkûre arsa-yı mevkūfe-i mezbûreden vüs‘at ve rey‘ ve kıymet ve rağbet cihetlerinden ezyed ve evfer ve istibdâli cânib-i vakfa enfa‘ ve evlâ olduğunu mi‘mârân-ı mezbûrân ve sâir Müslimûn-ı merkūmûn haber verdiklerini mevlânâ-yı mezbûr mahallinde tahrîr ve ma‘an meb‘ûs ümenâ-i şer‘den Çukadâr Halil b. Ali ve Muhzır Hüseyin Çelebi b. Yusuf ile meclis-i şer‘e gelip a‘lâ vukū‘ihî inhâ ve takrîr eyledikleri beyânıyla ber-minvâl-i muharrer istibdâl-i mezkûr için izn-i hümâyûnumu müş‘ir bâlâsı tuğra-yı garrâ ile muanven emr-i şerîfim ısdârını sen ki mevlânâ-yı mûmâ-ileyhsin i‘lâm etmenle i‘lâmın mûcibince amel olunmak fermânım olmağın imdi arsa-yı mevkūfe-i mezkûre mülk olan mekteb-i cedîd-i mezkûr vakıf olan arsa-yı mevkūfe-i mezkûreden kıymeten ve rağbeten ve ücreten ve müceddeden ezyed ve evfer ve istibdâli cânib-i vakf-ı şerîfe evlâ ve enfa‘ olup şürût-ı istibdâli mevcûde olduğu i‘lâmın meâlinden müstebân olmağla istibdâli tecvîz eyleyen fukahâ-yı zevi’l-ibtihâcın kavilleri üzere mülk mekteb-i cedîd-i mezkûr vakıf ve vakıf olan arsa-yı mevkūfe-i mezkûre mülk olmak ve vakf-ı evvelin şürûtu vakf-ı sânîde icrâ olunmak üzere istibdâl edip tarafeyne hüccet-i şer‘iye i‘tâsına mübâderet eylemek bâbında fermân-ı âlîşânım sâdır olmuşdur. Buyurdum ki ( ) hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vacibü’l-ittibâ‘ ve lâzimü’l-imtisâlimin mazmûn-ı itâ‘at-makrûnuyla âmil olasın, şöyle bilesin, alâmet-i şerîfe i‘timâd kılasın. Tahrîren fî-evâhiri şehri Cumâdelâhire sene 1246