İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 449 Hüküm no: 253 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tımarlı sabî ve mütekaidlerin yoklanması Bâ-sahh Tımarlı sabî yoklanmasına dâir emir İstanbul kādısı fazîletli efendi Rumeli ve Anadolu’da kâin eyâlât ve elviyede bulunan tımarlı sıbyân ve mütekā‘idînin yoklanmaları husûsuna mukaddemce <> irâde-i seniyye-i mülûkâne ta‘alluk ederek mahsûs yoklamacılar me’mûr ve ta‘yîn kılınmış ise de Âsitâne-i sa‘âdet ve Üsküdar ve Galata ve Boğaziçi ve Eyüb taraflarında dahi haylice tımarlı sabî ve mütekā‘id olduğundan bunların dahi atûfetlü serasker paşa hazretleri huzûrunda isbât-ı vücûd ederek yoklanmaları husûsuna irâde-i seniyye-i mülûkâne ta‘alluk etmiş olduğundan mahâll-i mezkûrede kâffe-i mahallâtda bulunan o makūle tımarlı sabî ve mütekā‘idînin yoklanmaları zımnında Bâb-ı Seraskerî’ye irsâlleri vesâilini istihsâle mübâderet eylemeleri bu def‘a bilâd-ı selâse kādıları fazîletli efendilere başka başka beyâz üzerine fermân-ı âlî ısdârıyla tenbîh olunmuş olmağla siz dahi eimme-i mahallâtı nezdinize celb ile Âsitâne-i sa‘âdet’de vâki‘ mahallâtda bulunan o makūle tımarlı sabî ve mütekā‘idînin yoklanmaları zımnında Bâb-ı Seraskerî’ye irsâllerine mübâderet eylemelerini tenbîh ve tefhîme mübâderet eyleyesiz deyü. Fî 7 Receb sene 1246