İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 450 Hüküm no: 254 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sâdık’a İstanbul ve Eyüp çörekçiler kedhüdalığı beratı verilmesi Çörekçiler kethüdâlığı berâtı Hademe-i hâssamdan ve erbâb-ı istihkākdan işbu râfi‘u tevkī‘-i refî‘i’ş-şân-ı hâkānî kıdvetü’l-emâsil ve’l-akrân Mehmed Sâdık -zîde kadruhu- mübârek rikāb-ı kamer-tâb-ı mülûkâneme arzuhâl sunup İstanbul ve Eyüb çörekçiler kethüdâlığı ber-vech-i nân-pâre kendüye tevcîh ve yedine müceddeden berât-ı şerîf-i âlîşân ihsân-ı hümâyûnum buyrulmasını istid‘â-yı inâyet etmekle şeref-efzâ-yı sünûh ve sudûr olan emr-i hümâyûn-ı merhamet-makrûn-ı şâhânem mûcibince zikr olunan İstanbul ve Eyüb çörekçiler kethüdâlığı mûmâ-ileyhe ber-vech-i nân-pâre ihâle ve ihsân-ı hümâyûnum buyrulmuş olmağla iktizâ eden kaleme kayd ve berât-ı şerîfim ısdâr olunmak bâbında sâdır olan fermân-ı âlîşânım mûcibince Başmuhâsebe’ye kayd ile berât-ı şerîfim i‘tâsını iftihâru’l-ümerâi ve’l-ekâbir müstecmi‘u cemî‘-i’l-mev[â]lî ve’l-mefâhir el-muhtassu bi-mezîd-i inâyeti’l-Meliki’l-kādir bi’l-fî‘l başdefterdârım Ali Necib Bey -dâme ulüvvühu- telhîs etmekle telhîsi mûcibince tevcîh ve muhâsebe-i merkūmeye kayd ile berât-ı şerîfim i‘tâ olunmak fermânım olunmağın hakkında mezîd-i inâyet-i pâdişâhânem zuhûra getirip bin iki yüz kırk altı senesi Şa‘bân-ı şerîfinin ikinci günü târîhiyle müverrah verilen ruûs-ı hümâyûnum mûcibince bu berât-ı hümâyûnu verdim ve buyurdum ki mûmâ-ileyh Mehmed Sâdık -zîde kadruhu- varıp vech-i meşrûh üzere ber-vech-i nân-pâre kethüdâlık-ı mezkûra mutasarrıf olup hizmet-i lâzimesin bî-kusûr mer‘î ve müeddî kıldıkdan sonra işbu berât-ı âlîşânıma mugāyir kethüdâlığı umûruna taraf-ı âhardan hiç ferd mâni‘ olmayıp dahl ve ta‘arruz kılmaya ve ol bâbda devâm-ı eyyâm-ı [91a] ömr ve devlet-i şehinşâhânem ed‘iyesine muvâzabet ve iştigāl üzere ola, şöyle bile, alâmet-i şerîfeme i‘timâd kıla. Fî 3 Şa‘bân sene 1246