İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 451 Hüküm no: 255 Orijinal metin no: [91a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esnaf kâhyalarının esnaftan masraf adı altında fazla para almaması Esnâfın masrûfâtına dâir emir İstanbul kādısı fazîletli efendi ( ) ve ihtisâb nâzırı efendi Dersa‘âdet’de kâin esnâf tâifesinin esnâfça vâki‘ olan mesâriflerini kethüdâları rü’yet etmek ve iki üç ayda bir kere mesârifleri her kaç guruşa bâliğ olur ise esnâfına taksîm ve tahsîl eylemek usûllerinden ise de ekser esnâf kethüdâları tama‘-ı hâmlarından nâşî falan yere şunu bunu verdim diyerek esnâfı üzerine vâfir akçe tarh ve tahsîl edegeldikleri ve bu cihetle fukarâ-yı esnâf mağdûr olduğu sahîhan tahkīk olunup zamân-ı ma‘delet-nişan-ı şâhânede ferde gadr ve hasâr vukū‘una rızâ olmamak hasebiyle bu maddenin dahi bir taht-ı râbıtaya idrâcı lâzimeden olmakdan nâşî ba‘d-ez-în her bir esnâfın içlerinden mu‘teber olarak beş altı nefer kimesnenin ilmi lâhık olmadıkça kethüdâ bulunan şahıs bir akçe sarf etmemek ve esnâfdan mu‘teber olan beş altı neferin ma‘lûmları olarak kethüdâlarının masrûfâtı olacak akçe esnâf üzerine hîn-i tevzî‘ ve taksîmde her birinin mesârif defteri İstanbul kādısı ve ihtisâb nâzırı bulunanların manzûrları olarak bilâ-harc ve avâid imzâ ve mühürlenmedikçe tevzî‘ olunmamak ve hâric ez-defter-i mümzâ esnâf üzerine bir akçe tarh ve tevzî‘ kılınmamak ve ederi olur ise o makūlelerin haklarından gelinmek üzere nizâma rabt ve tevsîkiyle fukarâ-yı esnâfdan cânib-i seniyyü’l-cevânib-i cenâb-ı zıllullâhî için bir kat dahi da‘avât-ı hayriye isticlâb olunması tensîb ve irâde olunmuş olmağla bi’l-cümle esnâf kethüdâları söz anlarlarını nezdinize celb ve sûret-i irâdeyi ve aksi harekette bulunanların emr-i tedîbinde dakīka fevt olunmayacağını etrâfıyla tefhîm ve beyân ederek husûs-ı mezbûrun ale’d-devâm böylece icrâsı husûsuna dikkat ve bu maddeye müstemirren nezâret eyleyesin deyü. Fî 8 Receb sene 1246