İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 451 Hüküm no: 256 Orijinal metin no: [91a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Harameyn’e mektup göndereceklerin mektuplarını müjdecibaşına ulaştırması ve müjdecibaşının yola çıkması Müjdecibaşı İstanbul kādısı fazîletli efendi Müjdeci-i evvel ve sânî ağaların beher sene Ramazan-ı şerîf evâilinde ihrâcları mu‘tâd ise de ileride vaktin daraşması cihetiyle yollarda itlâf-ı hayvânâta bâdî olduğu bi’t-tahkīk işbu sene-i mübârekede ve bundan böyle müjdecibaşıların Şa‘bân-ı şerîfin on beşinde ihrâcları husûsuna müte‘allik olan irâde-i seniyye-i mülûkâne mûcibince herkes Harameyn-i şerîfeyne dâir ferâşet-i şerîfe ve sâir mektûblarını hâzırlayıp ona göre evvelce mûmâ-ileyhimâya teslîm eylemelerinin işâ‘a ve i‘lân olunması mukaddemce tarafınıza ve sâir lâzım gelenlere bâ-buyruldu tenbîh olunmuş ise de şimdiye kadar o makūle mekâtîbden teslîm kılınan be-gāyet cüz’î olduğu ifâde ve ihbâr olunmuş ve bi-mennihî te‘âlâ ağa-yı mûmâ-ileyhimânın hurûcları pek takarrüb eylemiş ve bu kere dahi keyfiyeti iktizâ edenlere tekîd kılınmış olmağla imdi zîr-i hükûmetinizde olan eimme-i mahallâtı nezdinize celb ile Harameyn-i şerîfeyne dâir mektûblarının hemen birkaç gün içinde götürüp vermelerini mahalleleri ahâlîsine tenbîh eylemelerini tefhîme mübâderet eyleyesin deyü Fî 7 Şa‘bân sene 1246