İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 452 Hüküm no: 257 Orijinal metin no: [91a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul, Eyüp, Üsküdar, Tophane ve Boğaziçi kebapçılar kâhyalığının Ali’ye tevcihi Kebâbçılar kethüdâlığı berâtı Mâbeyn-i Hümâyûnum hademesinden ve erbâb-ı istihkākdan işbu râfi‘u tevkī‘-i refî‘u’ş-şân-ı hâkānî kıdvetü’l-emâcid ve’l-a‘yân Ali -zîde mecdühû- mübârek rikāb-ı kamer-tâb-ı mülûkâneme arzuhâl sunup İstanbul ve Eyüb ve Tophane ve Üsküdar ve umûmen Boğaziçi kebabçılar ve şerbetçiler kethüdâlığı ber-vech-i nân-pâre kendüye tevcîh ve yedine müceddeden berât-ı âlîşânım ihsân-ı hümâyûnum buyrulmasını istid‘â-yı inâyet eylediğine binâen şeref-efzâ-yı sünûh ve sudûr olan emr-i hümâyûn-ı inâyet-makrûn-ı şâhânem mûcibince İstanbul ve Eyüb ve Tophane ve Üsküdar ve umûmen Boğaziçi kebabçılar ve şerbetçiler kethüdâlığı ber-vech-i nân-pâre mûmâ-ileyhe ihâle ve ihsân-ı hümâyûnum kılınmış olmağla kalemine kayd ile iktizâ eden berât-ı şerîfim i‘tâ olunmak üzere sâdır olan fermân-ı âlîşânım mûcibince Başmuhâsebe’ye kayd ve berâtı i‘tâ olunmak bâbında bi’l-fî‘l başdefterdârım iftihâru’l-ümerâi ve’l-ekâbir Mîr Ali Necib -dâme ulüvvühu- telhîs etmekle telhîsi mûcibince tevcîh ve muhâsebe-i merkūmeye kayd ile berâtı i‘tâ olunmak fermânım olmağın hakkında mezîd-i inâyet-i pâdişâhânem zuhûra getirip bin iki yüz kırk altı senesi Şa‘bânü’l-muazzamın ikinci günü târîhiyle müverrah verilen ruûs-ı hümâyûnum mûcibince bu berât-ı hümâyûnu verdim ve buyurdum ki mûmâ-ileyh Ali -zîde mecdühû- varıp vech-i meşrûh üzere kethüdâlık-ı mezkûra ber-vech-i nân-pâre mutasarrıf olup edâ-yı hizmet eyledikden sonra işbu berât-ı âlîşânıma mugāyir kethüdâlığı umûruna taraf-ı âhardan hiç ferd mâni‘ ve müzâhim olmayıp dahl ve ta‘arruz kılmayalar, şöyle bileler, alâmet-i şerîfe i‘timâd kılalar. Fî 3 Şa‘bân sene 1246