İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 456 Hüküm no: 260 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya ile anlaşma yapıldığından savaş nedeniyle Tuna’nın beri tarafından İstanbul’a gelenlerin memleketlerine dönmesi Rumeli’nden istîlâ sebebiyle Der-aliyye’ye hicret edenlerin memleketlerine azîmetleri husûsuna dâir İstanbul kādısı fazîletli efendi Devlet-i aliyye-i ebediyyetü’d-devâm ile Rusya Devleti beyninde mün‘akid olan ahid ve şart iktizâsınca bu def‘a devlet-i müşârun-ileyhâ nefs-i Silistre’den mâ‘adâ Tuna’nın beri yüzünde olan kâffe-i kazâ ve nevâhî ve kasabâtı tahliye ve Devlet-i aliyye me’mûrlarına teslîm etmekde olduğundan ol havâlî ahâlîsinden olup istîlâ cihetiyle hicret etmiş olanların sâye-i merhamet-vâye-i hazret-i şâhânede memleketleri tarafına azîmetle hars ü zira‘at ve kâr u kesbleriyle meşgūl olmaları lâzimeden ve iktizâ-yı irâde-i seniyye-i şâhâneden olarak bu vechile keyfiyeti iktizâ edenlere beyân eylemeleri lâzım gelenlere tenbîh olunmuş olmağla siz dahi bi’l-cümle mahallât imâmlarını nezdinize celb ile Tuna’nın beri yüzü ahâlîsinden olup mahallerinde mutavattın bulunan muhâcirînin me’vâ-yı kadîmlerine azîmet ve hars ü zira‘atleriyle kâr u kisblerine mübâşeret eylemelerini tefhîm etmelerini bi’l-etrâf ifâde ve telkīne mübâderet ve bu makūle memleketlerine gideceklerin ale’l-infirâd esâmîsini mübeyyin defterini dahi tanzîm ve takdîme dikkat eyleyesin deyü. Fî 22 R sene 1246