İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 456 Hüküm no: 261 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müjdecibaşıların Şaban ayının on beşinde yola çıkması Müjdebaşı icâleten ihrâclarına dâir İstanbul kādısı fazîletli efendi Müjdeci-i evvel ve sânî ağaların beher sene Ramazan-ı şerîf evâilinde ihrâcları mu‘tâd ise de ileride vakit dar kalıp kemâl-i acele ile gitmeleri lâzım gelerek yollarda menzil bârgirlerini sıkışdırıp bîçâre hayvânları bilâ-mûcib iz‘âc etmekde oldukları tahkīk kılınıp bu maddenin dahi bir hüsn-i sûreti lâzım gelmiş olmakdan nâşî işbu sene-i mübârekede ve bundan böyle zikr olunan müjdecibaşıların Şa‘bân-ı şerîfin on beşinde ihrâclarına irâde-i seniyye-i mülûkâne ta‘alluk edip ol bâbda hatt-ı hümâyûn-ı şevket-makrûn-ı mülûkâne şeref-efzâ-yı sahîfe-i sudûr buyrulmuş ve ol cihetle herkes Harameyn-i Şerîfeyne dâir ferâşet-i şerîfe ve sâir mektûblarını hâzırlayıp müjdecilere teslîm eylemeleri husûsunun İstanbul ve bilâd-ı selâsede vâki‘ bi’l-cümle mahallât ahâlîsine şimdiden i‘lân ve işâ‘ası îcâb-ı hâlden olmağla imdi zîr-i hükûmetinizde olan eimme-i mahallâtı nezdinize celb ile mûmâ-ileyhimânın Şa‘bân-ı şerîfin on beşinde Dersa‘âdet’ten hareket ve azîmet edeceklerini ve mektûblarının ona göre vaktinde vermelerini mahalleleri ahâlîsine i‘lân ve işâ‘a eylemelerini ifâde ve tefhîme mübâderet eyleyesin deyü. Fî 11 Ca sene [12]46