Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 404 Hüküm no: 473 Orijinal metin no: [76b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Abdullah’ın vakfettiği evin tasarruf hakkının eşi Hatice bt. Ahmed Efendi’ye ait olduğu Mahmiye-i İstanbul’da Murad Paşa-yı Atîk mahallesinde sâkin iken bundan akdem vefât eden Mahmud Efendi b. Abdullah b. Abdurrahman’ın sulbî kebîr oğlu Mehmed Çelebi meclis-i şer‘-i şerîf-i enver ve mahfil-i dîn-i münîf-i Muhammedî’de zikr-i âtî menzile vâzı‘ü’l-yed idiği sâbit ve mütehakkik olan yine müteveffâ-yı mezbûrun zevce-i metrûkesi hâmiletü hâzihi’l-vesîka Hatice bt. Ahmed Efendi nâm hâtun mahzarında üzerine da‘vâ ve takrîr-i kelâm edip babam müteveffâ-yı mezbûr Mahmud Efendi bin seksen yedi senesi Şa‘bânü’l-mu‘azzamı’nın sekizinci günü mahalle-i mezbûrede vâki‘ bir tarafı kayyım Mehmed Çelebi mülkü ve iki tarafı merhûm İbrahim Paşa mülkü olan muhterik saray ve bir tarafı tarîk-i âm ile mahdûd büyût-ı adîdeyi müştemil mülk menzilinin süknâ ve tasarrufunu evvelâ kendi nefsine ba‘dehû zevcesi vâlidemiz Âsiye Hâtun bt. sucu Ahmed Efendi’ye ba‘de mezbûre Âsiye Hâtun’dan olan evlâdına ba‘dehû kendi evlâdına ve evlâd-ı evlâdına ba‘de’l-inkırâz Murad Paşa-yı Atîk câmi‘-i şerîfi imâmına şart ve ta‘yîn ve ol vechile vakf ve tescîl ve ol târihde Davud Paşa mahkemesinde nâibü’ş-şer‘ olan Emir Ağazâde es-Seyyid Mehmed Efendi’ye tescîl-i şer‘ ettirip hâlâ fevt oldukda ben sulbî oğlu ve benden gayrı menzil-i mezbûra mütehakkik yoğiken mezbûre Hatice menzil-i mezbûru bi gayri hakkın zabt ve tasarruf eder suâl olunup menzil-i mezbûrdan kasr-ı yed ve bana teslîme tenbîh olunmak matlûbumdur dedikde gıbbe’s-suâl mezbûre Hatice cevâbında fi’l-hakīka zevcim müteveffâ-yı mezbûr hayâtında târih-i mezkûrda menzil-i mezbûru bâlâda ketb ü tahrîr olunan minvâl üzre vakf ve tescîl etmişdi lâkin mezbûr Mahmud Efendi zikr olunan vakfının tebdîl ve tağyîrini yedinde komağile bin doksan yedi senesi Saferü’l-hayrın yirmi altıncı günü mahkeme-i mezbûrede nâibü’ş-şer‘-i şerîf olan Mehmed Emin Efendi b. el-merhûm Mahmud Efendi huzûrunda menzil-i mezbûrun süknâ ve tasarrufunu nefsinden sonra benim için zevce-i menkûham olan Hatice Hâtun bt. Ahmed Efendi’ye benden sonra şurût-ı bâkiye alâ mâ kânet mütekarrire ola deyû tebdîl-i şurût edip hâkim-i mûmâ-ileyh dahi şurût-ı zâide-i mezkûrenin sıhhat ve lüzûmuna ba‘de hükm ve husûs-ı mezbûru nâtık hüccet-i şer‘iyye tahrîr edip mezkûr Mahmud Efendi fevt oldukda menzil-i mezbûr hakk-ı meşrûtum olmağla zabt ve tasarruf ederim deyû mezkûr Mehmed Emin Efendi’nin imzâsıyla mümzâ ve hatmiyle mahtûme ve târih-i mezkûre ile müverrah hüccet-i şer‘iyye ibrâz edip mezkûr Mehmed Çelebi muvâcehesinde feth ve kırâat olundukda mazmûnu min külli’l-vücûh takrîri meşrûhuna mutâbık bulunmağın gıbbe’l-istintâk ve’l-inkâr, mezbûre Hatice Hâtun’dan takrîr-i meşrûhuna beyyine taleb olundukda udûl-i müslimîn ve sikāt-ı muvahhidîn[den] olup mahmiye-i mezbûrede Topkapısı kurbunda sâkin Abdülbâkī Efendi b. Hasan ve Mustafa Efendi b. Veli nâm kimesnelere li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu mezkûre Hatice’nin zevci müteveffâ-yı mezbûr Mahmud Efendi b. Abdullah b. Abdurrahman Bey doksan yedi senesi Saferü’l-hayrının yirmi altıncı günü bâlâda şerh ve beyâna tafsîl [ve] ayân olanlar minvâl üzre vakfının tebdîl ve tağyîri yedinde komağile nâib-i mezkûr Mehmed Emin Efendi b. Mahmud Efendi huzûrunda menzil-i mezbûrun süknâ ve tasarrufunu nefsinden sonra zevcesi mezbûre Hatice Hâtun’a andan sonra şurût-ı bâkiye alâ mâ kânet mütekarrire ola [deyû] tebdîl-i şurût edip nâib-i mezkûr dahi şurût-ı zâide-i mezkûrenin sıhhat ve lüzûmuna ba‘de’l-hükm işbu hüccet-i şer‘iyye tahrîr olunmuşdur biz bu husûsa bu vech üzre şâhidleriz [77a] şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükmi’ş-şer‘î ve’l-kazâi’l-mer‘î menzil-i mezbûra müte‘allika mu‘ârazadan mezbûr Mehmed Çelebi men‘ olunup mâ vaka‘a bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Efendi b. Mehmed el-İmâm-ı mahalle-i mezbûre, Çukadâr Ahmed Beşe, Müezzin b. Ali Çelebi ser-bölük, İbrahim Çelebi b. Ahmed, Mustafa Çelebi b. Ahmed, el-Hâc Mustafa b. Tevekkül, Ali b. Bâli, Mehmed b. İdris.