Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 406 Hüküm no: 474 Orijinal metin no: [77a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Abdullah’ın bazı ev eşyalarını Saime bt. Abdullah’a hibe etmesi Mahmiye-i İstanbul’da Süleymaniye mahallesinde sâkine Sâliha bt. Abdullah nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde işbu bâ‘isü’l-kitâb Sâime bt. Abdullah mahzarında bi tav‘ihâ ikrâr-ı tâm ve takrîr-i kelâm edip silk-i mülkünde münselik iki güğüm ve iki tencere ve iki sahan ve minder ve on yastık ve bir kilim ve iki keçe ve iki yorgan ve bir neftî çuka ferâce min gayr ism-i mâl ıtlâk olunur şeyim olmamağla eşyâ-i mezkûremi mezbûr Sâime’ye hibe-i sahîha-i şer‘iyye ile hibe ve temlîk ve teslîm ol dahi meclis-i hibede ittihâb ve kabûl ve kabz eyledi ba‘de’l-yevm eşyâ-i mezkûre, mezkûre Sâime’nin mülk-i mevhûbesidir keyfe mâ yeşâ mutasarrıfe olsun dedikde gıbbe’t-tasdîki’ş-şer‘î bi’t-taleb ketb olundu. [Fi’l-yevmi’l]-aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hasan Ağa, Mustafa Çelebi b. Ahmed, Mehmed b. İdris, Ali [b.] Bâli.