İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 458 Hüküm no: 263 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmediye’de nişasta imalathanesi açılması Ahmediye nâm arâziye müceddeden nişâştacı kârhânesi inşâsına dâir ilmuhaber Çörekçiler kethüdâsı Ali Ağa’nın takdîm eylediği bir kıt‘a arzuhâli meâlinde cennet-mekân Sultan Ahmed Hân -tâbe serâhu- hazretlerinin vakf-ı şerîflerine bâ-hatt-ı hümâyûn-ı şevket-makrûn tashîh ve ilhâk buyrulmuş olan Ahmediye nâm mahal arsasından bâ-temessük-ı mütevellî iştirâ eylediği iki bin zirâ‘ arsa üzerine kendi mâlıyla nef‘an li’l-vakf müceddeden binâ ve inşâ edeceği bir bâb nişastahânede i‘mâl olunacak senevî lüzûmu mikdâr hınta râyic-i vakt üzere bulunan mahallinden ve kapan vâridâtından ve nişastacı esnâfına mîrî hıntasından verilegelen baş ve çörek hıntaları esnâf-ı merkūme kabûlden imtinâ‘ eder ise kendisi tarafından mübâya‘a eylemek üzere cânib-i vakf-ı şerîf-i mezkûrdan i‘tâ olunan bir kıt‘a nişastacı gediği temessüğü mantûkunca gedik-i mezkûr uhdesine kaydolunarak ruhsatı hâvî yedine sûret i‘tâsını istid‘â etmekle kuyûd-ı lâzimesi ba‘de’l-ihrâc iktizâsı zahîre nâzırı sa‘âdetlü es-Seyyid Veliyüddin Ağa hazretlerinden isti‘lâm olundukda nişastacı esnâfına mahsûs olarak mahâll-i ma‘lûmede kâin yirmi bâb kârhâne fîmâ-ba‘d ziyâde ve noksan olmamak ve içlerinden fevt ve mürd olanların kârhânesi evlâdı var ise evlâdına yok ise müstehakkı kalfasına verilip ecânibden mechûlü’l-ahvâl kimesneye verilmemek üzere esnâf-ı merkūme birbirine tekeffül olunarak nizâmı hâvî seksen iki târîhinde esnâf-ı merkūme yedlerine başka vakf-ı müşârun-ileyh bundan akdem ihsân ve ilhâk buyrulan Ahmediye nâm arâzi-i hâliyenin bundan böyle menâzil ve dekâkîn ve ebniye-i sâirenin i‘mârı lâzimeden ve arâzi-i merkūme mahâll-i vesî‘adan olmak takrîbiyle i‘mâr olundukça sekenesine muktezî eşyânın çâr[şı]lardan iştirâsı lâzım geleceği ve ba‘dehû mesâfe cihetiyle ahâlîsine nakilde usret olacağı derkâr ve mahâll-i mezkûre için esnâf mukayyed olan gediklerinden mâ‘adâ fakat birer gedik müceddeden taraf-ı vakf-ı müşârun-ileyhden tâliblerine istîcâr ile tez elden dekâkîn inşâsıyla i‘mâr ve vakf-ı müşârun-ileyhe menâfi‘-i kesîreyi mûcib olacağı âşikâr olduğundan her bir esnâfdan birer gedik iktizâsı vechile taraf-ı vakf-ı şerîfden bâ-temessük icâre-i müeccele ve mu‘accele takdîriyle tâliblerine verilerek şerâit üzere bundan böyle dahi düstûrü’l-amel tutulmak üzere ruhsatı hâvî ve hatt-ı hümâyûn-ı şevket-makrûn-ı mülûkâne İstanbul kādısı ve Harameyn-i Şerîfeyn müfettişi fazîletli efendiler hazarâtı ile ihtisâb nâzırı ve mütevellî-i vakf-ı şerîfe hitâben kırk üç senesinde başka evâmir-i şerîfe verilmiş ve sâlifü’z-zikr Ahmediye nâm mahalde vâki‘ iki bin zirâ‘ arsa şehriye otuz akçe icâre-i müeccele ve ma‘lûmu’l-mikdâr mu‘accele ile bir bâb nişastahâne gediği olmak üzere sâhib-i arzuhâl merkūm Ali Ağa’ya fürûht olunarak lâzım gelen mu‘accelesi Harameyn-i Şerîfeyn Hazînesi’ne bi’t-teslîm nişastahâne-i mezkûru merkūmun zabt ve tasarrufu için işbu sene-i mübâreke Saferu’l-hayrında cânib-i vakf-ı müşârun-ileyhden temessük i‘tâ olunmuş olduğu derkenârdan nümâyân olmağla bu takdîrce ağa-yı merkūmun mahâll-i mezkûrda müceddeden binâ ve inşâ edeceği nişastahânede i‘mâl olunacak nişastaya muktezî hıntayı nişastacı esnâfı usûlü üzere kapan-ı dakīk vâridâtından si‘r-i râyiciyle ashâbını bi’l-ırzâ mübâya‘a ve iştirâ ve narh-ı cârîsi üzere ibâdullâha bey‘ ve şirâ eylemek üzere ruhsatı hâvî Başmuhâsebe’ye kayd ile sûret ve iktizâ eden mahallere ilmuhaberleri i‘tâsıyla tanzîmi husûsu emr u irâde-i sâmî idüğünü memhûren i‘lâm eylediği bâ-takrîr lede’l-arz mûcibince sûret ve ilmuhaberleri i‘tâ olunmak bâbında sâdır olan fermân-ı âlî mûcibince Başmuhâsebe’ye kaydolunup iktizâ eden sûreti ve diğer ilmuhaberleri verilmeğe İstanbul kādısı fazîletli efendi hazretleri sicillâtına dahi işbu ilmuhaber verildi. Fî 15 Receb sene [12]46