İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 460 Hüküm no: 265 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Doğan ve ölenleri kaydetmekle görevlendirilen kişilerin maaşlarına zam yapılması Bu dahi Berây-ı ta‘yîn-i maaş iki nefer kâtibân me’mûr-ı tahrîr ve terkīn tevellüd ve müteveffâ ve dâhil ve hâric-i sekene-i İstanbul ki pîş ez-sekene-i mezbûre bâ-irâde-i seniyye tahrîr ve defâtir-i îşân tanzîm bude ve ba‘d-ez-în der-vukū‘-ı tevellüd ve fevt ve dâhil ve hâric-i sekene-i mezbûre tahrîr ve terkīn eş kâtibân-ı mûmâ-ileyhimâ ta‘yîn ve me’mûr ve in kadar meblağ maaş tahsîs eş irâde-i aliyye ta‘alluk kerde ve sûret dâde fermûde ber-mûceb-i memhûr takrîr-i hazret-i kādı-i İstanbul ve takrîr ve fermân-ı âlî fî-28 N sene 1245 ve bâ-fermân-ı şerîf. Fî şehr Guruş 250 25 Berây-ı müdîr-i mukayyidân zam şud. 275 Beheri Fî Guruş 125 Bundan akdem sekene-i İstanbul’un tahrîr ve ittihâz olunan defâtirinin ale’d-devâm vukū‘ bulacak tevellüd ve fevti ve dâhil ve hârici tahrîr ve terkīnine ta‘yîn ve tahsîs kılınan iki nefer kâtiblerinin beherine işbu sene-i mübâreke Cumâdelûlâsından i‘tibâren mâhiye yüz yirmi beşer guruşdan iki yüz elli guruş ma‘âş ta‘yîn olunmuş ise de milel-i selâse defâtirinin kayd ve terkīnleri husûsu bir madde-i müstakille olarak iki nefer mukayyide dahi ihtiyâc derkâr olduğundan emsâlleri misillü yüz yirmi beşer guruş mâhiye ile iki nefer mukayyid ta‘yîn ve işbu defter tahrîrinin şürût-ı müstahsenesine bi’r-ri‘âye hasr-ı evkāt edecek maslahat-ı mu‘tenâ-bahâdan olup defâtiri ve tahsîs olunan mühürler hıfz ve mukayyidleri idâre etmek üzere içlerinden birinin mâhiyesine yetmiş beş guruş zamla başmukayyid ve bi’l-îcâb başmukayyidin özrü zuhûrunda hizmetini idâre etmek için diğerinin mâhiyesine yirmi beş guruş ilâve ile ikinci mukayyid olmak üzere tanzîmi husûsunu fazîletli İstanbul kādısı efendi hazretleri bu def‘a bâ-takrîr inhâ etmekle verilen sûret-i mezkûr kaydı ba‘de’l-ihrâc iktizâsı suâl olundukda kâtib-i mûmâ-ileyhimânın işbu sene-i mübâreke Receb-i şerîfi gāyetine kadar îcâb eden ma‘âşlarının i‘tâsı için tezâkiri verilmiş olduğu derkenârda müstebân olmağla bu sûretde inhâ olunduğu üzere mûmâ-ileyhimânın ma‘âşlarına zam olunması ve yüz yirmi beş guruş mâhiye ile iki nefer mukayyid dahi ilâve kılınması menût-ı re’y-i sâmî idüğünü bâ-takrîr lede’l-arz fakat kâtib-i mûmâ-ileyhimânın birinin mâhiyesine yirmi beş guruş zamla yüz yirmi beş guruş ma‘âş ile müceddeden iki nefer mukayyid ta‘yîn olunması münâsib olmağla kâtib-i mûmâ-ileyhimâdan fakat birinin mâhiyesine mukayyidlerin müdîri olmak için yirmi beş guruş zam olunmak ve mukayyid-i sânî i‘tibârıyla diğerine zamdan sarf-ı nazar ile müceddeden ol vechile iki nefer mukayyid ilâve kılınması sûreti tanzîm olunmak bâbında sâdır olan fermân-ı âlî mûcibince sûretleri tahrîr olunmak fermân buyrulmağın mûcibince kaydolunup meblağ-ı mezkûr yirmi beş guruş zam ile kâtib-i mûmâ-ileyhimâya şehriye iki yüz elli guruş ta‘yîn olunduğunu mübeyyin işbu sûret verildi. Fî 28 N sene 1245