İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 463 Hüküm no: 267 Orijinal metin no: [94a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Doğan ve ölenleri kaydetmekle görevlendirilenlerin müdürü Avnullah Efendi’nin maaşına zam yapılması Avnullah Efendi’nin ma‘âş sûreti Berây-ı zamm-ı ma‘âş-ı Avnullah Efendi müdîr-i mukayyidât-ı me’mûre-i tahrîr ve terkīn-i tevellüd ve mütevellid ve dâhil ve hâric-i sekene-i İstanbul ki pîş ezîn sekene-i mezbûre bâ-irâde-i seniyye tahrîr ve defâtir-i îşân tanzîm ve mûmâ-ileyh müdîr-i mukayyidân nasb şüd ve in kadar meblağ ma‘âş ta‘yîn şüd ve hâlâ in kadar meblağ bâ-fermân-ı şerîf zam şüd ve tebdîlen sûret dâde fermûde ber-mûceb-i memhûr takrîr-i hazret-i kādı-i İstanbul ve fermân-ı âlî ve bâ-fermân-ı şerîf, fî-gurre-i M sene 1246 sûret dâde bude ve hâlâ ber in vech tebdîl şode fermûde. Fî şehr Guruş Kadîm 200 Zam 50 250 Bundan akdem sekene-i İstanbul’un tahrîr ve ittihâz olunan defâtirlerinin ale’d-devâm vukū‘ buldukça tevellüd ve fevtini ve dâhil ve hâricini tahrîr ve terkīnine ta‘yîn ve tahsîs kılınan Avnullah Efendi’nin mâhiyesinin iki yüz guruşa iblâğı bundan akdem iltimâs olundukda mâhiye-i sâbıkı olan yüz yirmi beş guruşu yirmi beş guruş zam ve ilâve ile ikrâm ve vaktiyle meblağ-ı mezkûra itmâm olunur kelâmıyla tevkīf olunmuş ise de efendi-i mûmâ-ileyh bu husûs ile ketebe-i sâireden sarf-ı nazar ederek dikkat ve ihtimâm ve taşradan Der-aliyye’ye gelip tavattun edenlerin i‘lâmlarının tahrîri bir madde-i müstakille denilmeğe sezâ olduğun ve topunu mûmâ-ileyh tahrîr eylediğin beyân-birle bundan sonra şevkine fütûr verilmeyerek mücerred ikdâmını mûcib olmak için mâhiyesinin iki yüz guruşa iblâğıyla ismi tasrîh olunarak yedine sûreti verilmiş idi. El-hâletü hâzihî mûmâ-ileyh Avnullah Efendi’nin mu‘ayyen olan iki yüz guruş ma‘âşına elli guruş zamla tebdîlen sûreti tahrîr olunmak fermân buyrulmağın mûcibince kaydolunup sâlifü’z-zikr mûmâ-ileyhin ma‘âşı iki yüz elli guruşa iblâğ olunduğunu mübeyyin işbu sûret verildi. Fî 4 L sene 1246