İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 463 Hüküm no: 268 Orijinal metin no: [94a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Suyolcuların sokaklarda açtığı çukurları kapatması Suyolcuların kaldırım ta‘mîrine dâir İstanbul kādısı fazîletli efendi Kâffe-i hâlde nezâfet levâzımına ri‘âyet muhsenât-ı umûrdan olmak ve el-hâletü hâzihî Ramazan-ı gufrân-nişan pek takarrüb etmek hasebiyle zât-ı merhamet-simât-ı şâhâne ekser cevâmi‘-i selâtîn-i şerîf buyuracakları derkâr ve bu cihetle sokakların ve mahallât aralarının şimdiden lâyıkıyla tathîri ve bâ-husûs suyolcu tâifesi dahi ötede beride çukurlar açarak hâli üzere bırakmakda olduklarından onların dahi bozdukları mahallerin yine onlar ma‘rifetleriyle evvelki gibi ta‘mîri mertebe-i vücûbdan idüğü vâreste-i kayd iş‘âr olarak bu bâbda îcâb-ı hâlin icrâsı atûfetlü serasker paşa hazretlerine [ve] ihtisâb nâzırı efendiye bâ-buyruldu tenbîh olunmuş ve suyolcuların açdıkları kaldırımların ta‘mîri maddesi dahi su nâzırına ihâle kılınmış olmağla siz dahi eimme-i mahallâtı nezdinize celb ile herkes o makūle mezbele ve lâşe ve çamurları hâne ve dükkânları önünden def‘ ve tathîr eylemeleri husûslarını mahalleleri ahâlîsine ifâde ve tefhîm eylemelerini etrâfıyla tenbîhe mübâderet eyleyesin deyü. Fî 21 Ş sene 1246