Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 406 Hüküm no: 475 Orijinal metin no: [77a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirkor v. Asvador’un Onuncu Sekbanlar odasına olan borcunu ödemesi gerektiği Dergâh-ı âlî yeniçerilerinin onuncu sekbânlara mahsûs oda mühimmâtiyçün mevkūf nukūda bi’l-fi‘l mütevellî olan bâ‘isü hâze’l-kitâb Ali Çavuş b. Mustafa nâm kimesne meclis-i şer‘-i şerîfde ekmekçi tâifesinden Kirkor v. Asvador nâm Ermeni muvâcehesinde üzerine da‘vâ ve takrîr-i kelâm edip mezbûr Kirkor zimmetinde bundan akdem idâne ve teslîm ol dahi istidâne ve kabz eylediği iki yüz yirmi beş guruşun yirmi beş guruşunu mezbûr Kirkor bana def‘ ve teslîm ben dahi yedinden ahz u kabz edip iki yüz guruş zimmetinde hakkım bâkī kalmağla hâlâ taleb ederim suâl olunup alıverilmesi matlûbumdur dedikde gıbbe’s-suâl mezbûr Kirkor cevâbında kaziyye minvâl-i muharrer üzre olup cihet-i mezkûreden müdde‘î-i mezbûra bâkī iki yüz guruş vâcibü’l-edâ ve lâzımü’l-kazâ deyni olduğu bi tav‘ihî ikrâr ve i‘tirâf etmeğin mûcebince meblağ-ı bâkī-i mezbûr iki yüz guruşu müdde‘î-i mezbûra edâ ve teslîme merkūm Kirkor’a tenbîh olunup mâ vaka‘a bi’t-taleb ketb olundu. Fi’l-yevmi’s-sânî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hasan b. Mustafa, Ali b. Bâli, Mehmed [b.] İdris.