İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 58 Hüküm no: 9 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Vartan’ın berber gediği hisselerinden bir kısmını karısına sattığı Berber mübâya‘ası Mahmiye-i İstanbul’da Kumkapı kurbünde Şeyh Ferhad mahallesinde mütemekkin Berber Vartan v. Serkiz nâm zimmî meclis-i şer‘-i hatîrde hâlâ zevcesi işbu bâ‘isetü’s-sifr şahsı mu‘arrefe İbraksa bt. Serope nâm Nasrâniye muvâcehesinde ikrâr-ı tâm ve takrîr-i kelâm edip mahmiye-i mezbûrede Nişancı Mehmed Paşa-yı atîk mahallesinde camcı dükkânı ve Çubukçu Abdullah Ağa menzili beyninde kâin şehriye beş guruş on para kirâ-i kadîmeli bir bâb berber dükkânı derûnunda mevcûde Başmuhâsebe Kalemi’nde diğer Vartan zimmî ismine mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye yedimde müstakıllen mülküm olmağla ben ber-minvâl-i muharrer mâlik olduğum gedik-i mezkûrun üç rub‘ hissesini yedimde ibkā ve mâ‘adâ bir rub‘ hissemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer’î ve safka-i vâhide ile zevcem mersûmeye bin guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin guruşu zevcem mersûme bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte’allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fîmâ-ba’d hisse-i mezkûrede benim aslâ ve kat‘â alâka ve medhalim kalmayıp zevcem mersûmenin mülk-i müşterâtı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 27 Şa‘bân sene 1246 Şuhûdü’l-hâl: Eş-şâhidûnü’s-sâbikūn